Ózbekstandaǵı Islam civilizaciyası orayı hám Rossiyanıń «Divi» kinokompaniyası menen birgelikte súwretke alınǵan «Ózbekstan. Jeńiske jol» atamasındaǵı tariyxıy-kórkem hújjetli film premerası bolıp ótedi.

Film tilekleslik, miyrim-shápáát hám milletleraralıq doslıq temasın ashıp bergen halda kórkem túsinik hám tariyxıy anıqlıq arqalı ótmishti eske alıwǵa qaratılǵan. Bul tariyxıy hújjetli filmniń tiykarǵı saxnaların súwretke alıw jumısları Tashkenttegi Eslew hám qádirlew maydanı, sonday-aq, urıs jıllarında haqıyqıy adamgershilikti ulıǵlawshı shańaraq sıpatında úlken mártlik kórsetip, túrli milletke tiyisli bolǵan 15 balanı saqlap alǵan temirshi Shoahmad Shomahmudovlar shańaraǵın eslewge qoyılǵan estelik kompleksi hám Jeńis parki aymaǵında alıp barıldı.
Tariyxtıń gúwalıq beriwinshe, bul urıs óziniń qorqınıshları menen jer júzi xalqınıń 80 procentin qamtıp alǵan hám bul kórsetkish oǵan shekem bolǵan barlıq sawashlardıń jıyındısınan da artıp ketetuǵının kórsetedi. Onda sol dáwirde ǵárezsiz bolǵan 73 mámleketten 1,7 milliard xalqı bolǵan 61 mámleket qatnasqan. Áskeriy háreketler 40 mámleket, úsh materik hám tórt okean aymaǵında alıp barılgan.
Bizge belgili, 1941-jılı respublikamız xalqı 6 million 800 mıńnan aslam adamdı quraytuǵın edi. Urıs baslanıwı menen derlik 2 million watanlasımız frontqa atlandı. Hár biri shın mánisinde qaharman bolǵan bul áziz insanlardıń 500 mıńnan aslamı ayawsız sawashlarda qaytıs boldı. Ózbekstan Respublikası Prezidenti Shavkat Mirziyoevtiń atap ótkenindey, «Biz bul sanlardı hár jılı qayta-qayta eske alamız. Bul ápiwayı sanlar emes. Olardıń negizinde kishipeyil analarımız, apalarımız, márt hám batır atalarımız, ata-babalarımız, pútkil xalqımızdıń kewlindegi sheksiz qayǵı jámlengen. Bul dárt hám azaptı ya san, ya sóz benen jetkeriwge bolmaydı».
Ekinshi jer júzilik urıs jıllarında Ózbekstan xalqı shama menen 6,5 million adamdı quraytuǵın edi. Sawashlar bolıp atırǵan aymaqlardan elimizge 1,5 millionnan aslam adam kóshirip alıp kelingen hám ózleri de urıstı basınan ótkerip atırǵanına qaramastan, Ózbekstan aymaǵına kelgen urıs jábirkeshleriniń hámmesine keńpeyil watanlaslarımız bar miyrimin bergen.
Urıs jıllarında haqıyqıy adamgershilikti ulıǵlaytuǵın ózbek shańaraǵı sıpatında úlken mártlik kórsetip, túrli milletke tiyisli bolǵan 15 balanı saqlaǵan temirshi Shoahmad Shomahmudovlardıń shańaraǵın qansha eslesek te az. Mine, 80 jıldan berli, Shoahmad Shomahmudovlar shańaraǵı kórsetken adamgershilik tek ǵana Ózbekstan xalqı ushın emes, al urıslar bolǵan aymaqlardan elimizge kóshirip alıp kelinip, mehir kórsetilgen 1,5 millionnan aslam adamnıń haqıyqıy watanı bolǵan dúnyanıń eń aldınǵı mámleketleri tárepinen de tán alınıp kelinbekte.
Rossiyanıń «Divi» kinokompaniyası tárepinen Ózbekstandaǵı Islam civilizaciyası orayı menen birgelikte súwretke alınǵan hám «Ózbekstan. Jeńiske jol» xalıqaralıq tariyxıy-hújjetli, kórkem serialın da mine usı tán alıwdıń bir úlgisi, dep aytıw múmkin. Bul hújjetli film Ózbekstannıń urıs jıllarında mıńlaǵan evakuaciya etilgen adamlardıń táǵdirine qosqan úlesine baǵıshlanǵan. Hújjetli filmde Rossiya, Evropa hám Ózbekstannıń jetekshi aktyorları, tariyxshılar hám dóretiwshilik toparlar qatnaspaqta. Sonıń ishinde, Ózbekstanda xızmet kórsetken artist Rustam Sadullaevtı da kóriw múmkin. Hújjetli-kórkem serial hár biri bes minuttan ibarat 5 bólimnen ibarat bolıp, Ózbekstanǵa evakuaciya etiwdiń tiykarǵı gumanitarlıq hám mádeniy táreplerin sáwlelendiredi.
Atap aytqanda:
• Ekinshi jer júzilik urıs jıllarında evakuaciya etilgenlerdiń Tashkentke keliwi;
• hár túrli respublikalardan jetim balalardı óz perzentindey qabıl etken ózbek shańaraqları;
• Ózbek áskerleri hám frontshılardıń mártligi;
Ekinshi jer júzilik urıs jıllarındaǵı óz-ara járdem dástúrleriniń dawamı sıpatında 1966-jılǵı jer silkiniwden keyin Tashkent qalasın qayta qurıwdaǵı awızbirshilik sıyaqlı tárepler qamtıp alınǵan.
Eń awır waqıtlarda Ózbekstannıń keńpeyilligin sáwlelendiretuǵın bul film hár birimiz ushın qanday eldiń perzenti ekenimizdi ańlaw hám seziniw ushın jáne bir imkaniyat.
Esletpe: Hámmemiz ushın maqtanısh sezimin bildiretuǵın, qorqınıshlı tariyxta Ózbekstannıń haqıyqıy mártligin jáne bir márte kórsetetuǵın bul filmniń premerasın jaqında – 2025-jıl 8-mayda «Rossiya Kultura»da saat 18:15te, sonday-aq, 9-may kúni «Sevimli» telekanalında saat 16:20 da ózbek tilinde tamasha etiw múmkin.

Ózbekstandaǵı Islam civilizaciyası
orayı Málimleme xızmeti