Qaraqalpaqstan Respublikası Joqarǵı Keńesiniń Baslıǵı Amanbay Orınbaev xalıqtıń abadan turmısın támiyinlew, puqaralardıń dáramat alıwına kómeklesiw baǵdarında ámelge asırılıp atırǵan jumıslar menen tanısıw maqsetinde Kegeyli rayonında boldı.

Dáslep Joqarǵı Keńes Baslıǵı rayondaǵı pillekeshler tárepinen pille jetistiriw boyınsha alıp barılıp atırǵan jumıslar menen tanıstı.
Bunnan soń Abadanlastırıw basqarmasınıń nálxanasında sayamanlı hám miyweli terek nállerin jetistiriw boyınsha jumıslar kórip shıǵıldı. Kemshilikler atap ótilip, bul baǵdardaǵı jumıslardı nátiyjeli shólkemlestiriw boyınsha tapsırmalar berildi.
Sonıń menen birge, respublikamız basshısı rayondaǵı «LANKO MIYA» qospa kárxanasınıń jańadan iri kólemli mebel ushın arnawlı ónimler islep shıǵarıw joybarı menen jaqınnan tanısıp, kárxana basshılarınıń jumıslardı bunnan bılay da jedellestiriwde ushırasıp atırǵan mashqalaları tıńlanıp, sol jerdiń ózinde olardı unamlı sheshiw boyınsha juwapkerlerge anıq tapsırmalar berildi.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Kegeyli rayonı «Aqtuba» awıl puqaralar jıyını aymaǵında boy tiklegen «Jańa Ózbekstan» massivi aymaǵında qurılıp atırǵan kóp qabatlı imaratlar qurılısınıń barısın da kózden ótkerdi. Juwapkerlerge qurılıs jumısların jedellestiriw, sonday-aq, sapalı etip orınlanıwın támiyinlew boyınsha kórsetpeler berdi.
Isbilermenlik dáwir talabı, bunı jaqsı túsingen respublikamız basshısı Kegeyli rayonında isbilermenlerge jaratılǵan sharayatlar menen tanısıw ushın, Nurlı bostan MPJ aymaǵında jaylasqan xalıqqa turmıslıq xızmet kórsetiw orayı, «Kegeyli mebel» JShJnıń mebel islep shıǵarıw ornı, «Milliy kiyimler» sawda ornınıń tigiw cexların kózden ótkerip, elimizde isbilermenler bárqulla qollap-kuwatlanatuǵınlıǵı atap ótildi.
Usılar menen bir qatarda, A.Orınbaev Jılwan jap MPJ aymaǵında úy aldı qıytaq jerinen nátiyjeli paydalanıp atırǵan Rima Bazarbaevanıń ıssıxanasındaǵı jumıslardı barıp kórdi. Onıń azǵana jerden mol ónim alıwǵa qaratılǵan baslaması kópshilikke úlgi bolıwı kerek ekenligi atap ótilip, qosımsha ıssıxanasın keńeytiwi ushın 10 mln. sum qarjı ajıratıw boyınsha juwapkerlerge tapsırma berildi.
Bunnan keyin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Kegeyli rayonınıń sociallıq-ekonomikalıq rawajlanıwı máselelerine arnalǵan májilis ótkerdi.
Onda dáslep ámelge asırılıp atırǵan jumıslar boyınsha úyreniwler nátiyjeleri, rayondaǵı investiciyalıq joybarlar, ózin-ózi bánt etken puqaralardıń shańaraqlarında ámelge asırılıp atırǵan jumıslar atap ɵtildi.
Sonday-aq, abadanlastırıw jumısları hám ekonomikalıq kórsetkishler tereń talqılanıp, jollardı ońlaw, sociallıq obektlerdi qurıw hám rekonstrukciyalaw jumısları boyınsha bar mashqalalar hám olardı sheshiw ilajları kórip shıǵıldı.
Májiliste respublikamız basshısı tárepinen atap ɵtilgen kemshiliklerdi saplastırıw boyınsha tiyisli shólkem hám juwapkerlerge anıq wazıypalar belgilep alındı. Bunnan tısqarı, óz wazıypasın orınlawda bir qatar kemshiliklerge jol qoyǵan ayırım mákeme basshılarına intizamiy jaza sharasın qollanıw, zárúr bolsa lawazımına ılayıqlıǵı máselesin úyrenip shıǵıw boyınsha juwapkerlerge kórsetpeler berildi.

Qaraqalpaqstan xabar agentligi