Mámleketimiz boylap Ózbekstan hám Qaraqalpaqstan xalıq shayırı, Ózbekstan Qaharmanı Ibrayım Yusupov tuwılǵanınıń 96 jıllıǵı múnásibeti menen ruwxıy-aǵartıwshılıq ilajları bolıp ótpekte.

Nókis qalasındaǵı I.Yusupov dóretiwshilik mektebinde, Shımbay rayonındaǵı «Taǵjap» awıl puqaralar jıyınında jaylasqan úy muzeyinde, Berdaq atındaǵı Qaraqalpaq mámleketlik universitetiniń Shımbay filialında da shayırdıń tuwılǵan kúni múnásibeti menen ilajlar bolıp ótti.
Ilajda Qaraqalpaqstan Jazıwshılar awqamınıń baslıǵı, Ózbekstan xalıq jazıwshısı K.Karimov, «Ámiwdárya» jurnalınıń bas redaktorı, Qaraqalpaqstan xalıq shayırı X.Dawletnazarov hám basqalar shayırdıń ómiri hám dóretiwshiligine toqtap ótti.
Ibrayım Yusupov 1929-jılı Shımbay rayonınıń Azat awılında tuwıldı. Balalıǵında Qaraqalpaq xalıq awız-eki dóretiwshilik úlgileri, Shıǵıs ádebiyatları hám klassikalıq ádebiyattıń wákilleri, studentlik jıllarında bolsa rus hám jáhán ádebiyatı dúrdanaları menen jaqınnan tanısıp, olardıń shıǵarmalarındaǵı kórkemlik sırların qunt penen úyrendi.
Shayırdıń “Baxıt lirikası,” “Kúnshıǵıs jolawshısına,” “Oylar,” “Jeti ıqlım,” “Dala ármanları,” “Kewil kewilden suw isher,” “Tumaris,” “Ilham,” “Táshiwishlerge bay dúnya,” “Duzlı samallar,” “Kewildegi keń dúnya,” “Bekligińdi buzba sen…,” “Hár kimniń óz zamanı bar” sıyaqlı qosıq toplamları basıp shıǵarıldı.
Onıń eki tomlıq “Tańlamalı shıǵarmalar” toplamları eki márte 1978-1979 hám 1992-jılları basıp shıǵarılǵan. Hár qıylı jıllarda basıp shıǵarılǵan toplamlarda shayırdıń “Joldas muǵallim,” “Akaciya gúllegen jerde,” “Aktrisanıń ıǵbalı,” “Gilemshi hayal,” “Eski fontan ertegi,” “Dala ármanları,” “Tumaris,” “Búlbil uyası,” “Perishte ay,” “Poseydonnıń qáhári,” “Watan topıraǵı” hám basqa dástan (poema)ları járiyalandı. Onıń shıǵarmaları rus, gruzin, qazaq, qırǵız, latısh sıyaqlı kóplegen shet tillerine awdarıldı.
Ilajda talantlı oqıwshılar, student-jaslar tárepinen nama- qosıqlar atqarıldı.

ÓzA