Vena qalasındaǵı Xalıqaralıq atom energiyası agentligi (XAEA) rezidenciyasında Ózbekstan Respublikasınıń yadrolıq infrastrukturasın rawajlandırıwǵa baylanıslı Integraciyalasqan jumıs rejesi (IWP) sheńberinde másláhátlesiw májilisi óz jumısın basladı.

Májiliste XAEA tárepiniń wákilleri hám Sanaat, radiaciya hám yadro qáwipsizligi komiteti baslıǵınıń orınbasarı Sardor Yoqubbekov basshılıǵındaǵı delegaciya qatnaspaqta.
Onda XAEAnıń Evropa boyınsha texnikalıq birge islesiw bóliminiń direktorı Eve-Kyulli Kala xanım hám Ózbekstannıń Venadaǵı turaqlı wákili Baxtiyor Ibrohimov shıǵıp sóylep, ushırasıwdıń áhmiyeti hám birgelikte birge islesiw perspektivaları haqqında sóz etti.
Ushırasıw sheńberinde Ózbekstan tárepinen mámlekette atom energetikası tarawın rawajlandırıwǵa qaratılǵan milliy strategiya, ámelge asırılıp atırǵan institucionallıq reformalar hám kadrlar potencialın arttırıwǵa baylanıslı Milliy háreketler rejesi boyınsha prezentaciya ótkerildi.
Májilis qatnasıwshısı, Sanaat, radiaciya hám yadrolıq qáwipsizlik komiteti málimleme xızmetiniń basshısı Bekzod Berdievtiń ÓzAǵa málim etiwinshe, prezentaciya waqtında nızamshılıq bazası, jámiyeshilikti xabardar etiw hám ekologiyalıq qáwipsizlikti támiyinlew ilajları haqqında hár tárepleme málimleme berildi.
– XAEA qánigeleri Ózbekstan menen ámeliy birge islesiw baǵdarların bunnan bılay da tereńlestiriw boyınsha óz usınısların bildirdi. Sonıń ishinde, texnikalıq járdem, ekspert másláhátleri, tallawlar hám bilimlendiriw baǵdarlamaların keńeytiw máseleleri dodalandı. Sonday-aq, 2022-2023-jıllarda ámelge asırılǵan jumıslardıń nátiyjeleri shıǵarılıp, keyingi jıllardaǵı tiykarǵı wazıypalar belgilep alındı. Sonıń menen birge, kadrlar tayarlaw, qorshaǵan ortalıqtı qorǵaw hám yadrolıq ayrıqsha jaǵdaylarǵa tayarlıq kóriw sıyaqlı áhmiyetli baǵdarlarda tájiriybe almasıwǵa kelisip alındı. Bunday birge islesiw táreplerdiń bul baǵdarda jaqsı nátiyjelerge erisiw imkaniyatın beredi, – dedi B.Berdiev.
Májilis óz jumısın dawam ettirmekte.

N.Ziyodullaeva, ÓzA