Ózbekstan Respublikası Prezidenti Shavkat Mirziyoev “Ishki isler uyımları sistemasın sanlı transformaciyalaw boyınsha kompleksli ilajlar haqqında”ǵı qararǵa qol qoydı.

Qarar menen ishki isler uyımlarınıń jumısında zamanagóy sanlı sheshimlerdi keńnen engiziw, jınayatshılıqqa qarsı gúresiw hám jámiyetlik qáwipsizlikti támiyinlewde jasalma intellekt imkaniyatlarınan nátiyjeli paydalanıw hám tarawda birden-bir texnologiyalıq qatnastı qáliplestiriw belgilendi.
Ishki isler uyımlarınıń málimleme infrastrukturasın birden-bir sistemaǵa birlestiriw, kriminogen jaǵdaylardı tallawdı avtomatlastırıwǵa ayrıqsha itibar qaratıldı.
Ishki isler uyımları quramında Sanlı texnologiyalar hám huqıqıy statistika departamenti jáne onıń aymaqlıq bólimleri shólkemlestirilip, olarǵa sanlı sheshimlerdi engiziw hám muwapıqlastırıw, elektron mámleketlik xızmetlerdi jetilistiriw, málimleme qáwipsizligin támiyinlew sıyaqlı wazıypalar júklendi.
Tashkent qalası hám Tashkent wálayatında sınaq tárizinde rayonlararalıq sanlı texnologiyalar bólimleriniń jumısı jolǵa qoyıladı.
Transformaciya processlerin jedellestiriw maqsetinde Ishki isler ministrligi janında “Sanlı joybarlar ofisi” shólkemlestiriledi hám oǵan Sanlı texnologiyalar ministrliginiń maman qánigeleri tartıladı.
Sonday-aq, jınayatshılıqqa qarsı gúresiw hám jámiyetlik qáwipsizlikti támiyinlew tarawında qábiletli jaslar, IT -park rezidentleri menen birgelikte innovaciyalıq programmalıq ónimler hám startap joybarlardı islep shıǵıw jolǵa qoyıladı.
Eń áhmiyetlisi, qararda xalıqqa elektron mámleketlik xızmetlerdi proaktiv hám kompozit tárizde usınıw arqalı qosımsha qolaylıqlar jaratıw boyınsha bir qatar tapsırmalar belgilendi.
Qararda kórsetilgen wazıypalardıń ámelge asırılıwı ishki isler uyımlarınıń nátiyjeliligin arttırıw, jınayatshılıqqa qarsı gúresiwde zamanagóy sheshimlerden paydalanıw, puqaralarǵa mámleketlik xızmetlerdi qolaylı hám jedel kórsetiw jáne málimleme qáwipsizligin támiyinlewde áhmiyetli qádem boladı.

ÓzA