CHexiyanıń Ózbekstandaǵı elshisi Lyubomir Frebort chex kompaniyalarınıń Oraylıq Aziyada turaqlı infrastruktura baslamaların qollap-quwatlawǵa qaratılǵan Evropa Awqamı investiciya strategiyası – «Global Gateway» sheńberinde qarjılandırılatuǵın joybarlarda qatnasıw imkaniyatı dıqqat penen úyrenilip atırǵanın ayttı.

– Sanlı jalǵanıw, transport, áhmiyetli shiyki zat, sonday-aq, suw, energetika hám klimat sıyaqlı tarawlarǵa toqtalmaqshıman,-deydi diplomat. – CHexiya Ózbekstannıń strategiyalıq paydalı qazılmaları, sonıń ishinde, uran hám mısqa bay kánlerine ayrıqsha qızıǵıwshılıq bildirmekte. Bul ústinlik Evropa támiynat shınjırın diversifikaciyalaw, atap aytqanda,CHexiya sanaatı turaqlılıǵı hám rawajlanıwın támiyinlew ushın zárúr bolǵan áhmiyetli shiyki zat hám basqa da resurslar jetkerip beretuǵın isenimli dárekler tabıw rejesine sáykes. 2023-jıl eki mámleket birgeliktegi jumısshı topar dúziw arqalı taw-kán hám geologiya tarawlarında birge islesiwdi sistemalastırıwǵa kelisip alǵan. Onıń esabınan chex kompaniyaları bul resurslardı qazıp alıw hám qayta islewdi qollap-quwatlaw ushın aldıńǵı kán texnologiyaları menen úskenelerin usınıs etpekte. Usı jıldıń basında CHexiyanıń kánshilik hám geologiya tarawındaǵı jetekshi kompaniya hám mákemelerinen ibarat delegaciya birge islesiw imkaniyatın ornında úyreniw maqsetinde Ózbekstanǵa keldi. Missiya dawamında ministrlik juwapkerleri menen tiykarǵı baǵdarlardı dodalaǵanbız. Ulıwma, Evropa Awqamı, atap aytqanda, CHexiya menen birge islesiw barlıq tárepler ushın paydalı format. Biziń kompaniyalar teń huqıqlı sheriklik ornatıwǵa tayar.
Lyubomir Frebort transport tarawına toqtap ótip, temir jol tarawındaǵı birge islesiwi mámleketler arasındaǵı ekonomikalıq qatnasta dástúriy baǵdar ekenin atap ótti:
– Házir biz usı tarawda ámelge asırılıwı kerek bolǵan bir iri joybar ústinde jumıs alıp barmaqtamız. Bunnan tısqarı chex kompaniyaları Samarqandtaǵı tramvay, Úrgenshtegi trolleybus parkin keńeytiw hám modernizaciyalaw, Tashkent metropoliteni sistemasın jetilistiriw názerde tutılǵan shártnamalar dúziw, aeroportlar hám hawa háreketin basqarıw menen baylanıslı infrastrukturanı rawajlandırıwǵa úles qosıwdan mápdar. «Ózbekstan hawa jolları» milliy aviakompaniyasına CHexiyada islep shıǵarılǵan L-410 samolyotları jetkerip berilmekte, rekreaciyalıq párwaz hám parashyut sportı ushın mólsherlengen kishi jeke menshik samolyotlarǵa qánigelesken islep shıǵarıwshımız da sheriklikke qızıǵıwshılıq bildirgen.
– Kiyatırǵan jaz máwsiminde Tashkent penen Praga hám Karlovi Vari arasındaǵı aviareysler qayta jolǵa qoyılǵanınan quwanıshlımız. Bul mámleketlerimizdiń ekonomikalıq hám mádeniy baylanısların jáne de bekkemleydi. CHexiya kompaniyası Ózbekstan metrologiya hám standartlastırıw laboratoriyaların Evropa standartı tiykarında modernizaciyalawda qatnasadı. Bul EA aymaǵına xızmet eksport etiwshi bolǵan kompaniyalar ushın júdá paydalı bolıp, bul processte standarttıń anıqlıǵı hám muwapıqlıǵı úlken áhmiyetke iye.
CHexiya Metrologiya institutı tiyisli qánigelik arttırıw baǵdarlamalarına tartılǵan. Sonıń ishinde, ózbekstanlı qánigeler CHexiya Respublikasında texnikalıq kónlikpeni tereńlestiriw maqsetinde oqıtılmaqta. «CzechInvest» kompaniyası bolsa sırt el investorların hám eksportshılardı qollap-quwatlaw, Ózbekstandı Evropa bazarına jaqınlastırıwǵa járdemlesiwshi keń kólemli xızmetler usınıs etedi.
Elshiniń sózlerine bola, CHexiya júdá kóp tarawlar boyınsha birge islesiwdiń úlken perspektivasın kórmekte. Kánshilik, transport, suw xojalıǵı, qala infrastrukturasın rawajlandırıw, aqıllı qala sheshimi, medicina texnologiyası, azıq-awqat sanaatı hám qorǵanıw usılardıń qatarına kiredi.
Juwmaqlap aytqanda, CHexiyanıń eksportqa qaratılǵan kárxanaları usı baǵdarlardıń hár birinde jańa, óz-ara paydalı sheriklik ornatıwǵa umtılmaqta.
Mámleketimiz ekonomikasın modernizaciyalaw hám diversifikaciyalaw dawam etip, CHexiya usı transformaciya procesinde uzaq múddetli sherik bolıwǵa tayar ekenligin tastıyıqlaǵan.

Muharrama Pirmatova tayarladı. ÓzA