Usı jıldıń 14-16 may kúnleri Tashkenttegi «Ózekspooray» oraylıq kórgizbeler kompleksinde «TextileExpo Uzbekistan-2025 Báhár» xalıqaralıq kórgizbesi bolıp ótedi.

Bul xalıqaralıq kórgizbeniń shólkemlestiriw processleri hám onnan kútilip atırǵan nátiyjeler haqqında «Iteca Exhibitions» xalıqaralıq kórgizbe kompaniyası joybarınıń direktorı Aziza Alimova tómendegilerdi aytıp berdi.

– Ózbekstan toqımashılıq sanaatı milliy ekonomikanıń strategiyalıq tarmaqlarınan biri bolıp esaplanatuǵının atap ótiw kerek. Mámleket paxta shiyki zatın qayta islewde jeterli potencialǵa iye bolıp, sońǵı jılları bul tarawda tereń qayta islew, eksport potencialın arttırıw hám jańa jumıs orınların jaratıw baǵdarında keń kólemli reformalar ámelge asırılmaqta. Jergilikli islep shıǵarıwshılar tek ǵana ishki bazarda emes, al dúnya sawda maydanlarında da óz ornına iye bolıp barmaqta.
Sonıń menen birge, toqımashılıq kárxanalarına aldınǵı texnologiyalardı engiziw, ekologiyalıq turaqlı óndiriske ótiw hám xalıqaralıq standartlarǵa sáykes ónim islep shıǵarıw sıyaqlı baǵdarlar tiykarǵı áhmiyetke iye bolmaqta. Ásirese, klaster sistemasınıń engiziliwi toqımashılıq shınjırınıń barlıq basqıshların birlestirip, tarawdıń básekige shıdamlılıǵın jáne de arttırmaqta. Bul bolsa Ózbekstandı Oraylıq Aziyada toqımashılıq oraylarınan birine aylandırıwǵa xızmet etpekte.

«TextileExpo Uzbekistan» kórgizbesine toqtap ótetuǵın bolsaq, usı taraw wákilleri ushın jılına eki márte ótkeriletuǵın tiykarǵı biznes ilajlarınan birine aylanǵan. Tiykarǵı itibardı jergilikli hám xalıqaralıq birge islesiwshiler arasında bekkem isenim tiykarında baylanıslardı jolǵa qoyıwǵa qaratamız.
Ilaj hár qıylı mámleketlerden kelgen qatnasıwshılarǵa óz sheshim hám ónimlerin usınıw, tájiriybe almasıw imkaniyatın jaratadı. Bıyıl 7 mámleketten 130 dan aslam kompaniya qatnasıwı kútilmekte. Belarus, Hindstan, Pakistan, Tájikstan, Túrkiya, Qıtay hám Ózbekstan kárxanaları óz stendleri arqalı jańa ónim hám texnologiyalardı kórsetedi. Túrkiya aksessuar islep shıǵarıwshıları topar túrinde qatnasıwı, sonday-aq, Qıtay kompaniyalarınıń belsene qatnasıwı tastıyıqlanǵan.
Kórgizbe óndiris procesiniń barlıq basqıshların, yaǵnıy shiyki zat tańlawdan baslap, tayar ónimge shekemgi processlerdi qatmtıp aladı. Qatnasıwshılar aldıńǵı texnologiyalar, innovaciyalıq sheshimler menen tanısıp, birge islesiw boyınsha tikkeley sóylesiwler alıp barıwı múmkin. Sonday-aq bayerler baǵdarlaması kóleminde tikkeley ushırasıwlar shólkemlestiriledi. Bul professional satıp alıwlar hám óndirisshiler arasında nátiyjeli sóylesiw ornatıwǵa xızmet etedi.

Bul platforma biznesti rawajlandırıw hám jańa bazarlarǵa shıǵıwǵa úlken jol ashatuǵının atap ótiw kerek. «TextileExpo Uzbekistan» kórgizbesi aymaqlıq hám xalıqaralıq birge islesiwdi keńeytiw, sawda baylanısların rawajlandırıw hám isenimli sherikler tabıw jáne mámlekettiń toqımashılıq potencialın kórsetiwde úlken orın iyeleydi.

ÓzAnıń xabarshısı
Nasiba Ziyodullaeva jazıp aldı