Pilleshilik – elimizde hayal-qızlardıń bántligin támiyinlew, qosımsha dáramat dáregin jaratıw hám milliy dástúrlerdi qásterlep saqlawda úlken áhmiyetke iye. Pille jetistiriw boyınsha úlken tájiriybege iye bolǵan beruniyli pillekeshler bıyıl da jedel jumıs alıp barıp, pilleshilik máwsimine qızǵın kirisip ketti.

– Usı jılı Beruniy rayonındaǵı 13 aymaq boylap 3212 qutı nawqan qurtı tarqatıldı. Bul arqalı 5100 hayal-qızdıń bántligi támiyinlendi. Arnawlı tayarlıq kórilgen shańaraqlarda pille qurtları ushın zárúr sharayat jaratılıp, olardı durıs tárbiyalawǵa ayrıqsha itibar qaratılmaqta, – deydi rayon hákimligi Málimleme xızmeti bólimi.
Atap aytqanda, Sarkop awıl puqaralar jıyınında 105 hayal-qızǵa 98 qutı nawqan qurtı tarqatılıp, házirgi waqıtta tárbiyalaw jumısları jedel pátlerde dawam etpekte. Jası úlken analar óz tájiriybeleri menen jaslarǵa úlgi bolıp, ustaz-shákirt dástúri tiklenbekte.
Sonday-aq, Ó.Jumaniyazov máhállesinde 71 shańaraqqa 101 qutı nawqan qurtı jetkerip berildi. Bul jerde de tárbiyalaw procesine qatań kirisilgen – azıqlıqtıń waqtında beriliwi, temperatura hám sanitariyalıq talaplarǵa ámel etiliwi támiyinlenbekte. Sebebi pille qurtı “gúmis talshıq” jaratqansha pillekeshlerge tınımsız miynet etiwge tuwra keledi.
Pille jetistiriw jumısları menen tanısqan rayon hákiminiń orınbasarı, Shańaraq hám hayal-qızlar bóliminiń baslıǵı S.Kozieva pille jetistiriwshilerdiń shańaraqlarında bolıp, olardıń miynetin ayrıqsha atap ótti hám minnetdarshılıq bildirdi.

Qaraqalpaqstan xabar agentligi