Tashkent qalasında ShBSh mámleketleri II Medicinalıq kongressi hám Ózbekstan kardiologlarınıń dástúriy jıllıq konferenciyası bolıp ótti.

«Zamanagóy kardiologiya: profilaktikadan joqarı texnologiyalarǵa shekem» teması sheńberinde ótkerilgen Kongress ShBShǵa aǵza mámleketler hám basqa da mámleketlerden jetekshi kardiologlar, kardioxirurglar, ilimpazlar, húkimet hám biznes wákillerin birlestirgen eń iri xalıqaralıq platformaǵa aylandı.
Ilaj sheńberinde plenar májilisler, xalıqaralıq simpoziumlar, sheberlik sabaqları hám jas qánigeler ushın jas ilimpazlar tańlawı ótkerildi. Júrek-qan tamır keselliklerin anıqlaw hám emlewdegi innovaciyalar, sanlı texnologiyalar, medicinalıq turizm hám xalıqaralıq birge islesiw máselelerine ayrıqsha itibar qaratıldı.
Kardioxirurgiya hám intervencion kardiologiyadaǵı innovaciyalar, medicinada jasalma intellekt hám genetika, medicinalıq bilimlendiriwdi rawajlandırıw, ilimiy joybarlar hám transshegaralıq birge islesiw sıyaqlı temalar kórip shıǵıldı. Bul baǵdarda belgili kardiolog, akademik hám professorlardıń bayanatları tıńlandı.
Atap aytqanda, abıraylı ilaj shólkemlestiriwshilerinen biri Respublikalıq qánigelestirilgen kardiologiya ilimiy-ámeliy medicina orayınıń direktorı, medicina ilimleriniń doktorı Xurshid Fozilov shıǵıp sóylep, bárinen burın miymanlardı elimizge saparı menen qızǵın qutlıqladı. Bul ilaj kardiologiya tarawındaǵı birge islesiwdi keńeytiw, tarawǵa zamanagóy, innovaciyalıq texnologiyalardı engiziw baǵdarında óz-ara tájiriybe almasıwda áhmiyetli xalıqaralıq platforma ekenin atap ótti.
Ilaj dawamında profilaktikalıq ilajlardı jetilistiriw, joqarı texnologiyalar, jasalma intellekt hám genetika imkaniyatların klinikalıq ámeliyatqa engiziw máseleleri dodalandı. Sonıń menen birge, medicinalıq bilimlendiriwdi rawajlandırıw hám xalıqaralıq birge islesiwdi tereńlestiriwge ayrıqsha itibar qaratıldı.

WzA