Sociallıq tarmaqlarda «Shılpıq arxeologiyalıq esteligi mádeniy miyras basqarmasına qanshelli qádirli? Qaraqalpaqstan xalqına ne?» degen atama astında bildirilgen pikirler boyınsha Mádeniy miyras agentligi rásmiy túsinik berdi.

Agentliktiń xabarına bola, Qaraqalpaqstan Respublikasınıń Ámiwdárya rayonında jaylasqan «Shılpıq» arxeologiyalıq esteligi Ózbekstan Ministrler Kabinetiniń 2019-jıl 4-oktyabrdegi 846-sanlı qararı menen milliy mádeniy miyras obektleri dizimine kirgizilgen hám mámleket qorǵawına alınǵan.
Házirgi kúnde «Shılpıq» – Qaraqalpaqstannıń eń belgili tariyxıy esteliklerinen biri bolıp, respublika mámleketlik gerbinde de súwretlengen. Jergilikli hám sırt el turistleri arasında keń itibarǵa iye bolǵan bul estelikke keliwshiler sanı jıldan-jılǵa artıp barmaqta. Estelikke alıp barıwshı jollar infrastrukturası jaqsılanǵan, tekshe qurılıp, keliwshilerge qolaylıqlar jaratılǵan.
«Shılpıq» birinshi márte 1940-jılı SSSR Ilimler Akademiyasınıń Xorezm ilimiy-arxeologiyalıq ekspediciyası tárepinen, Sergey Tolstov hám Yahyo Ǵulomov basshılıǵında úyrenilgen. Aylanba túrindegi bul áyyemgi imarat qalıń paqsa diywal menen oralǵan bolıp, kiriw ushın arnawlı ashıq jol qaldırılǵan. Jergilikli xalıq bul jerdiń payda bolıwın hár qıylı ápsanalar menen baylanıstıradı.
2025-jıldıń 4-6-aprel kúnleri bolıp ótken Aral mádeniyat sammiti sheńberinde «Shılpıq» esteligi fonında ashıq aspan astında úlken koncert ótkerildi. Bul ilaj onıń tariyxıy hám mádeniy áhmiyetin jáne bir márte kórsetti.
«Shılpıq» házirgi kúnde tek ǵana arxeologlar emes, al tariyx, mádeniyat hám kórkem óner ıqlasbentleri ushın da biybaha miyras bolıp esaplanadı.

Muhayyo Toshqoraeva, ÓzA