1-may sánesinen baslap mámleketimizde puqaralar jıyını baslıqlarınıń saylawı baslandı.

Bul áhmiyetli siyasiy ilajdı shólkemleskenlik penen ótkeriwge Shımbay rayonında qızǵın tayarlıqlar alıp barıldı. -Kópshilikke málim bolǵanınday bıyıldan baslap Ózbekstan Respublikasınıń «Puqaralar jıyını baslıǵın saylaw haqqında»ǵı nızamına ózgerisler hám qosımshalar kirgizildi,-deydi Shımbay rayonında saylawdı ótkeriwge kómeklesiwshi komissiya baslıǵı Ońǵarbay Bayniyazov.-Jańa redakciyadaǵı nızamǵa bola, endi mákan puqaralar jıyını baslıqlarınıń wákillik múddeti 5 jılǵa sozdırıldı. Bul ózgerisler puqaralar jıyını baslıǵı saylawına talabanlardıń qızıǵıwshılıǵın arttırıp, olardıń sanı kóbeymekte. Álbette, bul talabanlardıń hújjetleri komissiya aǵzaları tárepinen úyrenip shıǵılıp, eń múnásipleri ǵana saylawda qatnaspaqta. Búgingi kúnge shekem Tazǵara, Pashenttaw hám Qarakól elatlarında puqaralar jıyını baslıqlarınıń saylawı ótkerildi. Ótkerilgen saylawlarda Tazǵara hám Qarakól elatlarında bunnan aldın da puqaralar jıyını baslıǵı lawazımında islep kiyatırǵan Sadıq Ibrayımov penen Qurbanbay Adilovlar puqaralar jıyını baslıǵı etip saylanǵan bolsa, Pashenttaw awıl puqaralar jıyını baslıǵına Lalaxan Mambetmuratova jańadan saylandı.
Al, búgin Qamısarıq awıl puqaralar jıyını baslıǵı saylawın ótkeremiz.
Maǵlıwmat ushın aytıp ótetuǵın bolsaq, házirgi waqıtta Shımbay rayonında 22 ózin-ózi basqarıw uyımı bolıp, puqaralar jıyını baslıqlarınıń saylawın 19-mayda juwmaqlaw rejelestirilgen.

Adilbay Orazov,
Qaraqalpaqstan xabar agentligi sholıwshısı.