17-aprel-1-may kúnleri aralıǵında Iordaniyanıń Amman qalasında boks boyınsha jas óspirimler arasında Aziya chempionatı bolıp ótken edi.

Bul jarısta Ózbekstan saylandı komandası aǵzaları 15 altın, 15 gúmis hám 12 qola medalların qolǵa kirgizip, ulıwma komandalıq esapta ekinshi orındı iyelewge miyasar boldı.
Respublikamız jankúyerleri ushın áhmiyetli tárepi sonda, bul jarısta jas boksshilerimizden +80 kg salmaqta Artur Keńesbaev qola hám -70 Ulbosın Jalǵasbaeva gúmis medallardı qolǵa kirgizip, xalqımızdı sheksiz quwanıshqa bólegen edi.
3-may kúni usı jeńimpaz sportshılarım Nókis xalıqaralıq aeroportında respublikamız basshıları, boks jankúyerleri hám keń jámiyetshiliktiń qatnasıwında saltanatlı túrde kútip alındı.
Máresimde Qaraqalpaqstan Respublikası Joqarǵı Keńesi Baslıǵınıń orınbasarı, Ózbekstan boks federaciyası Qaraqalpaqstan bólimi baslıǵı R.Saparbaev, Sport ministri E.Qutıbaevlar jas boksshiler menen olardıń trenerleri hám ata-anaların pútkil xalqımız atınan qızǵın qutlıqlap, bunnan da joqarı nátiyjelerge erisiwinde tilekleslik bildirdi.
Ilajda boksshiler ózlerine kórsetip atırǵan bunday joqarı húrmet hám xoshamet ushın respublikamız basshılarına úlken raxmet aytıp, aldaǵı jarıslarda bunnan da joqarı nátiyjelerdi qolǵa kirgiziwge wáde berdi.

Qaraqalpaqstan xabar agentligi