Ózbekstan Respublikası Prezidenti Shavkat Mirziyoev hám Rossiya Federaciyası Prezidenti Vladimir Putin 3-may kúni bolıp ótken telefon arqalı sóylesiwde mámleketlerimiz arasındaǵı keń kólemli strategiyalıq sheriklik hám awqamlaslıq qatnasıqların jáne de rawajlandırıw hám bekkemlewdiń áhmiyetli máselelerin dodaladı.

Rossiya Prezidentiniń ótken jıl may ayındaǵı Ózbekstanǵa mámleketlik saparı dawamında erisilgen kelisimlerdi ámelge asırıw nátiyjeleri kórip shıǵıldı.
Óz-ara tovar almasıw pátin saqlap qalıw, ekonomikanıń tiykarǵı tarmaqlarında kooperaciyalıq joybarlardı jedellestiriw, aymaqlar hám biznes dárejesindegi jedel sóylesiwlerdi dawam ettiriwge qaratılǵan muwapıqlastırılǵan ilajlardı qabıllaw áhmiyetli ekeni atap ótildi.
Usı mánide, Tashkent qalasında besinshi «Innoprom. Oraylıq Aziya» xalıqaralıq sanaat kórgizbesi sheńberinde bolıp ótken isbilermenlik ilajlarınıń unamlı nátiyjeleri joqarı bahalandı.
Gumanitarlıq birge islesiw, bárinen burın, mádeniyat, kórkem óner, ilim hám bilimlendiriw, sport hám turizm tarawlarında keńeyip atırǵanı qanaatlanıwshılıq penen atap ótildi.
Ózbekstan hám Rossiya jetekshileri xalıqaralıq kún tártibindegi máseleler boyınsha da pikir alısıp, bolajaq ushırasıwlar rejesin dodaladı.

ÓzA