30-aprel kúni AQSh hám Ukraina siyrek ushırasatuǵın metallar qazıp alıwda birge islesiw hám mámleketti tiklew boyınsha Amerika-Ukraina investiciya qorın iske qosıw haqqında kelisimge qol qoydı. Kelisimge bola, tárepler teń huqıqqa iye boladı hám áhmiyetli materiallar, neft hám gaz tarawında jańa joybarlardı ámelge asıradı. Sonıń menen birge Ukraina aymaǵındaǵı barlıq resurslar, sonday-aq, «Ukrnafta» hám «Energoatom» mámleketlik korporaciyaları múlk sıpatında Kiev qadaǵalawı astında qaladı. Endi hújjet Joqarı Rada tárepinen ratifikaciyalanıwı zárúr.

Ukraina Bas ministriniń orınbasarı Yuliya Sviridenkonıń atap ótiwinshe, kelisim sheńberinde investiciya fondı birgelikte basqarıladı, táreplerdiń hesh biri sheshiwshi dawısqa iye bolmaydı.
– Dúzilip atırǵan qorda úles hám basqarıw huqıqı teńdey, – dep jazdı siyasatshı sociallıq tarmaqtaǵı betinde. – Tolıq iyelik hám qadaǵalaw Ukrainada qaladı. Aymaǵımız hám suwımızdaǵı barlıq resurslar ózimizge tiyisli. Qayaqtan hám ne qazıp alıwdı ózimizdiń mámleketimiz belgileydi. Jer astı baylıqları Ukraina múlki bolıp qaladı – usınday kelisim támiyinlengen.
AQSh qarjı ministri Skott Bessent te kelisimge qol qoyılǵanın tastıyıqladı.
«Reuters» agentliginiń jazıwınsha, qosımsha jáne eki hújjetke qol qoyıw rejelestirilgen. Tek ǵana Kiev bul máseleni úyreniwi ushın qosımsha waqıt soraǵan.
Ukraina Bas ministri Denis Shmigal 27-aprel kúni Bessent penen ushırasıw juwmaǵında Kiev Amerikanıń burın kórsetken finanslıq járdemi jer astı boyınsha kelisimge qarız minnetlemesi sıpatında kirgizilmewine erisken.
– Bul kelisim Rossiyaǵa Tramp hákimshiligi erkin, suveren hám gúllep-jasnaǵan Ukrainanı jaratıwǵa qaratılǵan uzaq múddetli tınıshlıq procesiniń tárepdarı ekeni haqqında anıq xabar beredi, – degen lawazımlı xızmetker ministrlik járiyalaǵan bildiriwde. – Ukrainanı tiklewge Rossiya áskeriy-sanaat kompleksin qarjılandırǵan mámleketler hám adamlardıń tartılıwı qadaǵan etiledi.
Ullı Britaniya sırtqı isler ministri Devid Lemmi kelisimge qol qoyılǵanın qollap-quwatlaǵan. Ol sociallıq tarmaq betinde Patshalıqtıń Ukraina menen bir ásirlik birge islesiw shártnamasına sadıqlıǵın ayrıqsha atap ótken.

ÓzA