Túrli tábiyǵıy apatshılıqlar insanǵa qıyınshılıqlar keltirip, xalıqqa, infrastrukturaǵa hár túrli kólemde zıyan jetkeredi. Ásirese, jer silkiniwler tábiyǵıy apatshılıqlar ishinde eń qáwiplilerinen biri bolıp, onı aldınnan biliwdiń imkaniyatı joq. Sonlıqtan da jer silkiniwlerdiń aqıbetleri ayanıshlı kórinis payda etiwi múmkin.

2023-jıl 16-mart kúni bolıp ótken Túrkiy mámleketler shólkeminiń gezeksiz sammitinde mámleketimiz basshısı tárepinen ayrıqsha jaǵdaylar boyınsha qánigelesken xalıqaralıq strukturalar menen ámeliy birge islesiwdi kúsheytiw zárúr ekenligine ayrıqsha itibar qaratılǵan edi. Ózbekstan Respublikası Prezidenti jer silkiniw qurbanlarına húrmet kórsetiw hám bul baǵdarda xalıqaralıq birge islesiw zárúr ekenligin esletiw maqsetinde eslew hám awızbirshilik kúnin shólkemlestiriw haqqındaǵı baslamanı alǵa qoydı.
Búgingi kúnde usı baslama ámelde óz nátiyjesin kórsetti. 2025-jıl 29-aprelde Birlesken Milletler Shólkeminiń Nyu-Yorktaǵı bas rezidenciyasında BMSh Bas Assambleyası Ózbekstannıń baslaması menen 29-apreldi Xalıqaralıq jer silkiniw qurbanların eslew kúni dep járiyalaw haqqındaǵı rezolyuciyanı qabıl etti. Hújjetke dúnyanıń barlıq regionlarınan 80 nen aslam mámleket te qosılǵan.
Xalıqaralıq jer silkiniw qurbanların eslew kúni birinshi márte 2026-jıl 29-aprel kúni belgilenedi. Bul sáne 1966-jılı Tashkent qalasında júz bergen jer silkiniwdiń 60 jıllıǵı múnásibeti menen belgilendi.
Jaqında BMSh Bas Assambleyası Ózbekstannıń baslaması menen Toǵay jetistiriw hám toǵaydı tiklew dekadası haqqındaǵı rezolyuciyanı da qabıl etkenin usı jerde atap ótiw zárúr.
Xalıqaralıq jer silkiniw qurbanların eslew kúnin belgilewge baylanıslı rezolyuciya bolsa sońǵı jıllarda Ózbekstannıń baslaması menen qabıl etilgen 13-rezolyuciya esaplanadı. Usı rezolyuciyanıń qabıl etiliwi Ózbekstannıń xalıqaralıq maydandaǵı abırayı barǵan sayın artıp baratırǵanın, mámleketimiz basshısınıń xalıqaralıq sheńberdegi áhmiyetli baslamalarınan biri bolǵanın kórsetedi.

Muhtarama Komilova, ÓzA