Ózbekstan Respublikası Prezidenti Sh.Mirziyoevtiń atap ótkenindey búgin barlıq reformalar máhállede bolmaqta. Máhálleniń kelbeti ózgerip, adamlarımızdıń mashqala hám táshwishleri sol aymaqtıń ózinde sheshilmekte.

Usı kózkarastan, bıyılǵı máhálle baslıqlarınıń saylawın jańasha demokratiyalıq principler tiykarında, ashıq-aydınlıq, puqaralarımızdıń tilegin, erk-ıqrarın erkin bildiriw principlerine sáykes túrde ótkeriw boyınsha barlıq kúsh hám imkaniyatlar jumsalmaqta. Atap aytqanda, elimizde usı jıldıń basınan may-iyul aylarında ótkeriletuǵın máhálle baslıqları saylawına qızǵın tayarlıq jumısları ámelge asırılıp, Ózbekstan Respublikasınıń «Puqaralar jıyını baslıǵın saylaw haqqında»ǵı nızamına ózgerisler hám qosımshalar kirgizildi. Oǵan bola, bunnan bılay puqaralar jıyını baslıqlarınıń wákillik múddeti
5 jılǵa sozdırıldı.
Al, 2025-jıldıń 21-fevral sánesinde bolsa, Qaraqalpaqstan Respublikası Joqarǵı Keńesiniń «Qaraqalpaqstan Respublikasında puqaralar jıyını baslıǵı saylawına tayarlıq kóriw hám onı ótkeriwge járdemlesiw haqqında»ǵı 123-sanlı Prezidium qararı qabıl etildi. Usı hújjet penen saylawdı shólkemlestiriw hám ótkeriwge járdemlesiwshi Qaraqalpaqstan Respublikası komissiyası shólkemlestirilip, xalıq deputatları qalalıq hám rayonlıq Keńesleriniń qararları menen saylawdı shólkemlestiriw hám ótkeriwge kómeklesiwshi Nókis qalası hám rayonlıq komissiyalar, sonday-aq hár bir máhállede saylawdı ótkeriwge járdemlesiwshi jumısshı toparlar dúzildi.
-Qaraqalpaqstan Respublikasında shólkemlestirilip atırǵan saylaw ilajlarında jámi 142 mıńnan aslam wákillerdiń qatnasıwı kútilmekte,-deydi Ózbekstan Máhálleleri assosaciyası Qaraqalpaqstan Respublikası basqarması baslıǵınıń orınbasarı A.Pirimbetov.- Sonday-aq, Máhálle baslıǵın saylawdı shólkemlestiriw hám ótkeriw processlerin ǵalaba xabar qurallarında sáwlelendiriw boyınsha Ózbekstan máhálleler assosaciyası tárepinen arnawlı media-reje islep shıǵıldı. Saylawdı ótkeriw hám onda puqaralardıń qatnasıw tártibi boyınsha rásmiy veb-sayt hám aymaqlıq sociallıq tarmaqlarda kúndelikli maǵlıwmatlar berip barılmaqta. Máhálle baslıǵın saylaw may ayınıń 1-sánesinen baslap iyul ayına shekem dawam etedi.
Sonıń ishinde, 1-may kúni Nókis qalası Nawqan baǵ mákan puqaralar jıyını baslıǵın saylaw ilajı bolıp ótti.
Onda saylawdı shólkemlestiriwshi hám ótkeriwshi tiyisli jumısshı topar aǵzaları menen birge 300 den aslam aymaq turǵınlarınıń wákilleri qatnastı.
Ilajdı jumısshı topardıń baslıǵı A.Torekeeva ashıp berdi hám saylaw tártibi boyınsha dawıs beriw jolı menen jıynalıs xatkeri, prezidium aǵzaları hám esap-sanaq komissiyasınıń aǵzaları tastıyıqlandı.
Bunnan soń jıynalǵanlarǵa Nawqan baǵ mákan puqaralar jıyını baslıǵı lawazımına talabanlardıń ómir bayanı hám miynet jolı tanıstırıldı.
Óz gezeginde, aymaq turǵınları talabanlardan máhálleniń keleshektegi rawajlanıwına baylanıslı ózlerin qızıqtırǵan sorawlarına juwap aldı hám Ózbekstan Respublikası “Puqaralar jıyını baslıǵın saylaw haqqında”ǵı nızamınıń 20-statyasında belgilengen talaplar boyınsha dawıs beriwge ruxsat berildi.
Saylawshılardıń dawıs beriwi juwmaǵında, esap-sanaq komissiyası berilgen dawıslar sanı boyınsha óz bayanlamasın oqıp esittirdi.
Ashıq-aydınlıq principi tiykarında ótkerilgen Máhálle baslıǵın saylaw juwmaǵına bola, Zamira Joldashovna Aytbaeva Nókis qalası Nawqan baǵ mákan puqaralar jıyınınıń baslıǵı etip saylandı.

Adilbay Orazov,
Qaraqalpaqstan xabar agentligi sholıwshısı.