Evropa parlamenti hám Belgiya Senatı tárepinen Bryussel qalasında shólkemlestirilgen «Genderge bolǵan seziwsheń parlamentler» temasındaǵı seminarda Ózbekstan parlamenti wákilleri de qatnastı.

Oǵan Evropa, Belgiya, Germaniya, Litva, CHexiya parlamenti aǵzaları hám Gender teńlik boyınsha Evropa institutı direktorı hám Evropa Awqamınıń «Inter Pares» joybarınıń basshısı menen bir qatarda Ózbekstan Senatınıń Jaslar, hayal-qızlar, mádeniyat hám sport máseleleri komitetiniń baslıǵı Orazgul Qozixonova hám Byudjet hám ekonomikalıq máseleler komiteti baslıǵınıń orınbasarı Qobil Tursunov qatnastı.
Ilajda Ózbekstan búgingi kúnde gender teńlikti támiyinlewde jeterli tájiriybege iye ekeni, tarawda nızamshılıq bekkemlenip, bunnan bılay da jetiliskeni, nátiyjeli mexanizmler jaratılǵanı hám onda parlamenttiń belsene qatnası atap ótildi.
Evropa parlamenti vice-prezidenti hám gender teńlik boyınsha joqarı dárejedegi topar aǵzası Nikolay Stefanuta usı jıl 6-9-aprel kúnleri Ózbekstanǵa ámelge asırǵan saparı waqtında mámlekette alıp barılıp atırǵan reformalarǵa gúwa bolǵanın atap ótti. Jańa Ózbekstan búgingi kúnde ashıq-aydın hám demokratiyalıq jolda baratırǵanın atap ótti.
Evropa parlamenti Sırtqı isler komiteti baslıǵınıń orınbasarı Xana Jalloul Ózbekstanda nızamshılıq jetilisip atırǵanı hám mámleket tájiriybesi basqa da mámleketlerge paydalı bolatuǵının atap ótip, elimizge sapar etiw niyetin bildirdi.
Seminarda Evropa parlamentiniń jumısı, mexanizmleri hám dinamikası menen tanısıldı, sonday-aq, Evropa Awqamı hám Ózbekstanda gender teńlik hám hayal-qızlar huqıqların támiyinlew tarawındaǵı ózgerisler jáne basım hám zorlıqtıń aldın alıw máseleleri dodalandı. Nızam dóretiwshiligi hám qadaǵalaw ilajları, jámiyetshiliktiń qatnası hám gender audit boyınsha tájiriybe almasıldı. Parlementleraralıq birge islesiwdi bunnan bılay da rawajlandırıw hám nızamshılıqtı jetilistiriw boyınsha usınıslar islep shıǵıldı.

N.Abduraimova, ÓzAnıń xabarshısı