Ózbekstan Respublikası Prezidenti «Jańa Ózbekstan» universitetiniń jumısın jáne de jetilistiriw ilajları haqqında» qarar qabıl etti.

Oǵan muwapıq, tómendegi tiykarǵı maqsetler belgilendi:

a) eń talantlı jaslar hám joqarı potenciallı professor-oqıtıwshılardıń ilimiy mekteplerin qáliplestiriw;

b) ilimiy hám innovaciyalıq kózqaras tiykarında sanaatta eksport hám óndiris nátiyjeliligin arttırıw, ózine túser bahanı azaytıwǵa qaratılǵan ilimiy joybarlardı ámelge asırıw;

v) dúnya kólemindegi ilimiy laboratoriyalardı shólkemlestiriw hám zamanagóy ásbap-úskeneler menen támiyinlew;

g) xalıqaralıq standartlar hám aldınǵı tájiriybe tiykarında medicina tarawında bilimlendiriw, ámeliyat hám ilimiy-izertlew jumısınıń sáykesligin támiyinlew, taraw ushın básekige shıdamlı hám joqarı mamanlıqtaǵı qánigeler tayarlaw.

Prezident qararına muwapıq, “Jańa Ózbekstan” universitetiniń zamanagóy ilimiy laboratoriya bazası qáliplestiriledi, aldınǵı texnologiyalıq ásbap-úskeneler menen támiyinlenedi hám injenerlik-texnikalıq, jasalma intellekt, nanotexnologiyalar, “jasıl” ekonomika hám medicina tarawların rawajlandırıwǵa qaratılǵan ilimiy izertlewler keńeytilip, hám olardıń transferi boyınsha nátiyjeli sistema qáliplestiriledi.

Resurslardı birlestiriw arqalı aldınǵı tájiriybe tiykarında Universitette mámlekettiń ekonomikası hám sociallıq turmısındaǵı tiykarǵı tarawlarda joqarı bilimge iye kadrlar tayarlaw hám joqarı nátiyjelilikke tiykarlanǵan ilimiy-izertlew jumısların shólkemlestiriw sisteması jolǵa qoyıladı.

Aprobaciya procesinen ótip, engizilgen zamanagóy bilimlendiriw texnologiyaları hám joqarı bilimlendiriw shólkemin basqarıw sistemaların respublikanıń basqa da joqarı bilimlendiriw shólkemlerine basqıshpa-basqısh engiziw maqsetinde Universitet janında yuridikalıq tárep esaplanǵan aldıńǵı bilim hám tájiriybeler transferi orayı shólkemlestiriledi.

Universitetke tómendegi huqıqlar beriledi:

ilimiy ataqlar hám ilimiy dárejeler beriwshi ilimiy keńesler dúziw, olardıń quramın tastıyıqlaw;

tiyisli qánigelikler boyınsha ilimiy ataq hám ilimiy dárejelerdi beriw, sonday-aq, doktorant hám erkin izleniwshilerge ilimiy basshılıq etiw tártibin tastıyıqlaw;

2025-2026-oqıw jılınan baslap Universitettiń magistratura qánigelikleri studentlerine Ózbekstan Respublikası Ministrler Kabinetiniń 2022-jıl 2-iyundaǵı 300-sanlı qararı menen bilimlendiriwdiń bakalavriat basqıshına engizilgen mámleketlik granttı ajıratıw tártibi engiziledi;

2027-jıl 1-dekabrge shekem Universitet ushın alıp kelinetuǵın hám alternativleri Ózbekstanda islep shıǵarılmaytuǵın qurılma, programmalıq hám texnikalıq qurallar, komplektlewshi bólekler bajıxana tólemlerinen (qosımsha qun salıǵı, akciz salıǵı hám bajıxana rásmiylestiriwi jıyımlarınan tısqarı) azat etiledi.

Qararǵa bola, sırt el qánigelerin keńnen tartqan halda Evropa standartlari tiykarında Universitette Germaniya Federativlik Respublikasınıń joqarı bilimlendiriw shólkemleri menen birgelikte medicina fakulteti shólkemlestiriledi.

                                                                                                                                  ÓzA