Prezident Shavkat Mirziyoev 30-aprel kúni Al-Xorezmiy universitetin shólkemlestiriӯ boyınsha prezentaciya menen tanıstı.

Mámleketimiz basshısı 2022-jıl avgust ayında Úrgensh qalasındaǵı Al-Xorezmiy qalashasınıń qurılısına tiykar salǵan edi. Ol jerde ullı ilimpaz atındaǵı universitet hám qánigelestirilgen mektep te boladı.
Prezentaciyada usı bilimlendiriӯ orayların shólkemlestiriӯ ilajları, tiykarǵı baǵdarları haqqında málimleme berildi.
Universitette 3: matematika hám informatika fakulteti, aerokosmoslıq texnologiyalar injenerligi fakulteti hám jasalma intellekt fakulteti boladı. Olarda ekonomika, málimleme texnologiyaları, sanaat, qáӯipsizlik, energetika hám ekologiya sıyaqlı taraӯlar ushın qánigeler tayarlanadı. Sabaqlar ózbek hám inglis tillerinde, kredit-modul sisteması tiykarında alıp barıladı.
Oqıӯ processleri «Jańa Ózbekstan» universitetiniń tájiriybesi tiykarında, Birlesken Arab Ámirlikleri, Qıtay Xalıq Respublikası, Ullı Britaniya sıyaqlı mámleketlerdiń abıraylı joqarı bilimlendiriӯ shólkemleri menen birgelikte shólkemlestiriledi.
Qabıllaӯdı 2025-2026-oqıӯ jılınan baslaӯ rejelestirilgen. Ulıӯma studentler sanı 4-6 mıń átirapında bolıwı názerde tutılǵan.
Qala aymaǵında Tashkenttegi Muhammad al-Xorezmiy mektebiniń filialı da shólkemlestiriledi. Oǵan 4-klass pitkeriӯshileri tańlap alınadı. Bilimlendiriӯdiń juӯmaqlaӯshı 2 jılı injenerlikke baslanǵısh tayarlıqqa qaratıladı.
Mámleketimiz basshısı universitet aymaǵı tek bilimlendiriӯ emes, al Xorezmniń tariyxıy-ilimiy hám turizm potencialı menen sáykes kompleks bolıӯı kerek ekenligin atap ótti. Usı zamanagóy bilimlendiriӯ mákemelerin shólkemlestiriӯge baylanıslı hújjetke qol qoyıldı.

ÓzA