Rásmiy Pekin Awǵanstandı 2025-jıldıń ekinshi yarımında Qıtayda bolıp ótetuǵın Shanxay birge islesiw shólkemi (ShBSh) sammitinde qatnasıwǵa mirát etti, dep xabar bermekte “Dunyo” MA xabarshısı.

Irannıń «Mehr news» málimleme agentliginiń maǵlıwmatına bola, Qıtaydıń Qabuldaǵı elshisi CHjao Cin mirátnamanı jetkerip, Pekin eki tárepleme baylanıslardı tereńlestiriw tilegin atap ótken. Diplomattıń aytıwınsha, Qıtay jaqın qońsı sıpatında Awǵanstan menen konstruktivlik sóylesiwden mápdar, ásirese, ShBShnıń regionallıq qáwipsizlikti támiyinlewdegi roli artıp atırǵan bir sharayatta.
Óz gezeginde, Awǵanstan sırtqı isler ministriniń orınbasarı Muhammad Nayim óz-ara birge islesiwdi bekkemlewge tayar ekenin bildirip, turaqlı sheriklik hár eki tárepke de payda keltiretuǵının atap ótken.
Esletip ótemiz, Awǵanstan 2012-jıldan berli ShBShda baqlawshı statusına iye. 2025-jılǵı sammitke mirát etiw Awǵanstannıń kóp tárepleme regionallıq birge islesiwge basqıshpa-basqısh qaytıwı jolındaǵı áhmiyetli qádem bolıwı múmkin.

Qaraqalpaqstan xabar agentligi