I.V.Savickiy atındaǵı mámleketlik kórkem óner muzeyinde «Muzeyler bay tariyxımız hám mádeniyatımızdıń biytákirar ǵáziynesi» atamasında «Muzeyler hápteligi» ilajları ótkerildi.

Bul ilajlar Mádeniyat, sport hám turizm xızmetkerleri kásiplik awqamı Qaraqalpaqstan Respublikası birleken komiteti tárepinen Mádeniyat, Sport ministrligi hám Ózbekstan Kórkem óner akademiyası Qaraqalpaqstan bólimleri menen birgelikte shólkemlestirildi.
Ilajda Mádeniyat, sport hám turizm xızmetkerleri kásiplik awqamı Qaraqalpaqstan Respublikası birleken komitetiniń baslıǵı J.Ayapov hám basqalar shıǵıp sóylep, ótkerilip atırǵan ilajlardıń áhmiyetine toqtap ótip, Ózbekstan kásiplik awqamlarınıń 120 jıllıǵı, tariyxı hám rawajlanıw basqıshları tuwralı maǵlıwmatlar berildi.
Atap ótilgenindey, pútkil dúnyada bolǵanı sıyaqlı XX ásir baslarında Túrkstan jerinde de kásiplik awqamları payda bolıwınan aldın islewshi-xızmetkerler hár qıylı dógerek, jıyın hám awqamlarǵa birlese baslaǵan. Olardıń atında “Kásiplik” sózi bolmasa da, olar jumıslarına qarap, islewshi-xızmetkerler tárepinen ózleriniń ekonomikalıq hám kásiplik máplerin qorǵaw máselelerinde jumıs alıp barǵan.
Túrkstanda birinshi rásmiy emes dógerekler 1903-jılı Tashkentte, 1904-jılı Samarqandta payda bolǵan. 1905-jıldıń gúzine kelip, Tashkentte jumısshılardıń 15 dógeregi jumıs alıp barǵan. Bul dógerekler barǵan sayın kásiplik awqam shólkemleriniń payda bolıwında áhmiyetli rol atqardı.
Ózbekstan Respublikası ǵárezsizlikke eriskennen soń respublikada 25 taraw kásiplik awqamları dúzilip, olar óz Ustavların qabıl etti. 1991-jılı usı kásiplik awqamları tárepinen Ózbekstan kásiplik awqamları Federaciyası shólkemlestirildi. Sol waqıttan berli bir neshshe ret tarawlıq kásiplik awqamlarınıń qosılıwı arqalı qayta shólkemlestiriw jumısları ámelge asırıldı. Sońǵı jıllarda kásiplik awqamları jámiyetimizdiń kerekli bir bólegine aylandı.
Ózbekstan kásiplik awqamlarınıń mámleketimizdiń sociallıq turmısındaǵı úlken ornı hám áhmiyetin itibarǵa alıp, Ózbekstanda 11-noyabr sánesi «Kásiplik awqamları kúni» dep belgilenip, Jańa Ózbekstannıń jańa kásiplik awqamları qáliplesti.
Ilajda miynet nuraniyları hám kásiplik awqamı belsendilerine Mádeniyat, sport hám turizm xızmetkerleri kásiplik awqamı Qaraqalpaqstan Respublikası birleken komiteti tárepinen diplom hám estelik sawǵalar tapsırıldı.
Soń miymanlar muzey kinozalına, ilimiy kitapxanasına alıp barılıp, muzey tariyxı haqqında maǵlıwmatlar, hújjetli videofilm qoyıp berildi. Sonday-aq, arnawlı prezentaciyalar menen tanıstırıldı.
Qatnasıwshılardıń muzey zalları boylap sayaxatı shólkemlestirildi. Bul ilaj Nókis qalasındaǵı 1-sanlı balalar muzıka hám kórkem óner mektebiniń duwtarshı qızları hám Berdaq atındaǵı akademiyalıq muzıka teatrı artistleriniń atqarıwındaǵı koncert baǵdarlaması menen dawam etip, qatnasıwshılarǵa ayrıqsha zawıq baǵıshladı.

Á.Jiyemuratov,
Qaraqalpaqstan xabar agentligi