Bas prokurordıń orınbasarı Sh.Aminov basshılıǵındaǵı ministrlik hám uyımlar delegaciyası usı jıldıń 28-29-aprel kúnleri Moskva qalasında bolıp ótken miynet migraciyası hám migrantlar huqıqların qorǵaw máseleleri boyınsha Ózbekstan-Rossiya uyımlararalıq jumısshı toparınıń birinshi májilisinde qatnastı.

Ilajda Rossiya tárepinen RF Bas prokurorınıń orınbasarı P.Gorodov basshılıǵında Bas prokuratura, Federal qáwipsizlik xızmeti, Sırtqı isler, Ishki isler ministrlikleri hám basqa da uyımlardıń wákilleri qatnasqan.
Ilaj dawamında tárepler migraciya tarawındaǵı ámeldegi jaǵday, mashqalalı tárepleri hám olardı sheshiw jolların dodaladı. Májilis qatnasıwshıları eki mámlekettiń máplerin esapqa alǵan halda migraciya tarawında nızamlılıqtı támiyinlewge qaratılǵan birgeliktegi ilajlardı islep shıǵıwǵa kelisip aldı.
Eki mámleket Bas prokuraturaları Ózbekstan puqaralarınıń Rossiyaǵa jumıs islew maqsetinde keliwi hám Rossiya puqaralarınıń Ózbekstanǵa keliwi procesinde olardıń huqıqlarǵa ámel etiliwi ústinen qadaǵalaw hám baqlawdı kúsheytiw minnetlemesin aldı.
Ilaj sońında delegaciyalardıń basshıları miynet migraciyası hám migrantlardıń huqıqların qorǵaw máseleleri boyınsha Ózbekstan – Rossiya uyımlararalıq jumısshı toparınıń birinshi májilisinde qabıl etilgen qararlar sáwlelengen bildiriwge qol qoydı.

Qaraqalpaqstan xabar agentligi