Senattıń jalpı májilisinde «Ózbekstan Respublikası menen Ázerbayjan Respublikası arasında awqamlaslıq qatnasıqları haqqındaǵı Shártnamanı (Tashkent, 2024-jıl 23-avgust) ratifikaciyalaw haqqında»ǵı nızam kórip shıǵıldı.

– Nızam menen ratifikaciyalanıp atırǵan bul Shártnama Ózbekstan hám Ázerbayjan Prezidentleri tárepinen 2024-jıl 23-avgust kúni Tashkent qalasında bolıp ótken Ózbekstan Respublikası hám Ázerbayjan Respublikası Joqarı mámleketleraralıq keńesiniń birinshi májilisi sheńberinde qol qoyılǵan,-dedi Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komiteti baslıǵınıń orınbasarı Odiljan Mamatkarimov. – Bul Shártnama eki mámleket ǵárezsizligi, suvereniteti, aymaqlıq pútinligi hám turaqlı ekonomikalıq rawajlanıwın jáne de bekkemlewge qaratılǵan mámleketleraralıq qatnasqlardıń jańa basqıshın shártanamalıq-huqıqıy jaqtan bekkemlewdi názerde tutadı.
Shártnamada táreplerdiń bir-birine qarsı qaratılǵan hesh qanday bloklar yamasa awqamlarda qatnaspaw hám táreplerden biriniń pikiri boyınsha eki mámlekettiń strategiyalıq sherikligi hám awqamlaslıq qatnasıqlarına zıyan keltiretuǵın hár qanday háreketlerde qatnasıwdan saqlanıw sıyaqlı wazıypalar belgilengen.
Nızam menen bul Shártnamanıń ratifikaciyalanıwı eki mámleket arasındaǵı óz-ara isenim, doslıq baylanısları hám strategiyalıq sheriklikti jáne de bekkemleydi.
Shártnama siyasiy birge islesiwdi keńeytiw, sawda-ekonomikalıq hám mádeniy gumanitarlıq baylanıslardı rawajlandırıw, jańa joybarlardı ámelge asırıw ushın qolaylı sharayat jaratadı.
Senatorlar maqullaǵan nızam menen eki mámlekettiń aymaqları arasındaǵı tikkeley baylanıslardı kúsheytiw, logistika, energetika, sanaat, bilimlendiriw hám turizm sıyaqlı tarawlarda birgeliktegi joybarlardı ámelge asırıw imkaniyatlarına keń jol ashıladı.

N.Abduraimova, ÓzA