Búgingi kúnde dúnyada dushshı suw dárekleri barǵan sayın azayıp barmaqta. Bul mashqala Ózbekstanda jáne de keskinlesip atırǵanı hesh kimge sır emes.

Maǵlıwmatlarǵa qaraǵanda, keyingi 20 jıl ishinde Ózbekstan derlik suwsız qalıwı múmkin ekenligi aytıladı. Bul awır ekologiyalıq másele bar suw rezervlerin qásterlep-saqlaw, tarawǵa innovaciyalıq texnologiyalardı engizgen halda suwdan nátiyjeli paydalanıw ilajların kóriwdi talap etedi.
Sol sebepli elimizde suwdan aqılǵa uǵras paydalanıw boyınsha bir qatar háreketler ámelge asırılmaqta. Bul baǵdarda Ózbekstan Ekologiyalıq partiyası jawın hám qar suwların toplaǵan halda paydalanıw hám basqa da bir qatar ideya hám baslamalar menen shıqtı. Suwdı ısırap etpew, onnan únemli paydalanıw, jaslardıń ekologiya hám suw resurslarına juwapkershilikli qatnasın qáliplestiriwge qaratılǵan ilajlar, turmıslıq joybarlardı ámelge asırıp kelmekte.
Búgin Ózbekstan Ekologiyalıq partiyası Oraylıq Keńesinde «Aquagenica» sırt el kompaniyasınıń wákilleri menen ótkerilgen ushırasıw da suw máselesine baylanıslı boldı.
Bul sırt el kompaniyası atmosfera hawasınan ishimlik suwın alıw boyınsha zamanagóy úskeneler islep shıǵıwǵa qánigelesken. Ushırasıwda atmosfera hawasınan ishimlik suwın alıw boyınsha birge islesiw hám tájiriybe almasıw máseleleri dodalandı.
Atap ótilgenindey, suw resurslarınan nátiyjeli paydalanıwdı támiyinlew, alıs hám shól aymaqlarında xalıqtıń ishimlik suwına bolǵan talabın qanaatlandırıwda innovaciyalıq texnologiyalardı engiziw boyınsha partiya tárepinen úyreniwler ámelge asırılmaqta. Ózbekstan sharayatında kóplegen aymaqlarda atmosfera hawasınan taza ishimlik suwı yamasa texnikalıq suw alıw texnologiyalarınan paydalanıw múmkin.
Sóylesiwde atmosfera hawasınan ishimlik suwın alıw boyınsha zamanagóy úskeneler islep shıǵaratuǵın bul kompaniya menen keleshekte birgelikte isleniwi múmkin bolǵan jumıslar hár tárepleme dodalandı.

M.Komilova, ÓzA