Húrmetli konferenciya qatnasıwshıları, húrmetli miymanlar!

Bárinen burın, siz, ázizlerdi ilim hám rawajlanıwǵa úlken úles qosqan Ózbekstan jerinde, onıń eń áyyemgi qalalarınan biri – gózzal Samarqandta ullı alım Imam Abu Mansur Maturidiy tuwılǵanınıń 1155 jıllıǵına baǵıshlanıp ótkerilip atırǵan xalıqaralıq konferenciyanıń ashılıwı menen shın kewlimnen qutlıqlayman.
Janajan Watanımızǵa, ullı alım hám oyshıllar jeri bolǵan gózzal Samarqand qalasına xosh keldińiz!
“Kalom iliminiń sultanı,” “Musılmanlardıń isenimin dúzetiwshi” degen joqarı mártebege erisken Imam Maturidiy orta ásirlerde – ideyalıq gúresler háwij alǵan oǵada qıyın dáwirde islam dininiń adamgershilik mánisin keńnen ashıp beretuǵın biybaha ilimiy-aǵartıwshılıq shıǵarmalar dóretkeni, hár qıylı zıyanlı aǵımlar hám jawızlıqqa qarsı mártlershe gúres alıp barǵanı, álbette, haqıyqıy ruwxıy mártlik úlgisi bolıp esaplanadı.
Ullı watanlasımız tiykar salǵan maturidiylik mektebi hám táliymatı bolsa isenim baǵdarında ásirler dawamında keńpeyillik, tınıshlıq hám aǵartıwshılıq tımsalı bolıp kiyatırǵanı maqtawǵa ılayıq.
Bul máńgilik táliymat muqaddes dinimizdiń jaqsı ideyaların qálbekilestiriw, olardan ǵárezli maqsetlerde paydalanıwǵa qaratılǵan buzǵınshı háreketler jańa usıllarda dawam etip atırǵan búgingi kúnde úlken áhmiyetke iye bolıp baratırǵanı, siz húrmetli ánjuman qatnasıwshıları, álbette, jaqsı túsinesiz hám biz bunı joqarı qádirleymiz.
Húrmetli doslar!
Jańa Ózbekstanda islam civilizaciyasınıń rawajlanıwına biybaha úles qosqan alımlardıń ibratlı ómir jolı hám bay ilimiy miyrasın hár tárepleme tereń úyreniw hám keńnen úgit-násiyatlaw, jaslardı Watanǵa muhabbat, milliy hám ulıwma insanıylıq qádiriyatlarǵa húrmet ruwxında tárbiyalaw boyınsha úlken jumıslar ámelge asırılmaqta.
Elimizde Islam civilizaciyası orayı, Imam Buxariy, Imam Maturidiy, Imam Termiziy sıyaqlı ullı alımlarımızdıń atları menen atalatuǵın xalıqaralıq ilimiy-izertlew orayları, Ózbekstan xalıqaralıq islamtanıw akademiyası jumıs alıp barmaqta.
Ótken qısqa waqıt dawamında bul ilimiy oraylar tárepinen Quranı karim hám basqa muqaddes diniy dáreklerdiń sırt el fondlarında saqlanıp kiyatırǵan siyrek ushırasatuǵın qoljazbaları tabılıp, olardıń nusqaları elimizge alınıp kelingeni, ilim hám aǵartıwshılıqtıń rawajlanıwına sheksiz úles qosqan ullı insanlardıń kóplegen shıǵarmaları ózbek tiline awdarılǵanı bul tarawda alıp barılıp atırǵan jumıslar kóleminen dárek beredi. Sonıń ishinde, Imam Maturidiydiń “Tavilot al-Quron” hám “Kitob at-tavhid” kitapları birinshi ret ózbek tiline awdarılıp, keń jámiyetshiliktiń itibarına usınılǵanın atap ótiw kerek.
Biz xalıqaralıq ilimiy-izertlew mákemeleri, sizler sıyaqlı musılman dúnyasında úlken abırayǵa iye bolǵan ilimpazlar menen birgelikte Imam Maturidiydiń kóp táreplemeli ómir jolı hám ilimiy miyrasın, bul táliymattıń búgingi kúndegi áhmiyetin jáne de tereń úyreniwge ayrıqsha itibar qaratpaqtamız.
Usı maqsette Imam Maturiydiń 1155 jıllıq tuwılǵan sánesin keńnen belgilew haqqında qarar qabıl etip, bul baǵdarda ámelge asırılatuǵın jumıslar, sonıń ishinde, ullı oyshıl babamızdıń Samarqandtaǵı estelik kompleksin keńeytip, jáne de abat zıyarat ornına aylandırıw boyınsha wazıypalardı anıq etip belgilep aldıq.
Bizge belgili, 2020-jılı Samarqand qalasında ótkerilgen xalıqaralıq konferenciya qatnasıwshılarınıń usınısı tiykarında Ózbekstan xalıqaralıq islam akademiyası janında Imam Maturidiy xalıqaralıq ilimiy-izertlew orayı shólkemlestirilgen edi.
Búgingi kúnde ullı babamız qaldırǵan bay ilimiy-aǵartıwshılıq miyrastıń áhmiyeti dúnya kóleminde barǵan sayın artıp atırǵanın esapqa alıp hám bul Oraydıń abırayın hám mártebesin jáne de arttırıw maqsetinde, jaqında qol qoyılǵan Pármanǵa muwapıq, Imam Maturidiy xalıqaralıq ilimiy-izertlew orayı Ministrler Kabineti janında qayta shólkemlestirilgenin ayrıqsha atap ótpekshimen.
Bul oray Imam Maturidiy háziretleriniń islam dininiń rawajlanıwına qosqan biybaha úlesi hám maturidiylik táliymatın tereń úyreniwde dúnyanıń hár qıylı mámleketlerindegi ilimpaz hám ulamalardı birlestiretuǵın xalıqaralıq platforma bolıp xızmet etedi, dep isenemen.
Pursattan paydalanıp, óz ómirin mine, usınday iygilikli iske baǵıshlap kiyatırǵan siz, ázizlerge Imam Maturidiy hám Ózbekstan jerinen jetisip shıqqan basqa da ullı ulamalarımızdıń bay ilimiy-diniy miyrasın úyreniw jolındaǵı mashaqatlı miynetińiz, izleniw hám izertlewlerińiz ushın shın júrekten minnetdarshılıq bildirip, bársheńizge bekkem densawlıq, kelesi jumısıńızda jańa jetiskenlikler, konferenciya jumısına bolsa tabıslar tileymen.

Shavkat Mirziyoev,
Ózbekstan Respublikası Prezidenti