Ózbekstan Respublikası Prezidenti Shavkat Mirziyoev 29-aprel kúni Pútkil jer júzilik júziw federaciyasınıń basshısı, Aziya Olimpiada keńesiniń bas direktorı Husayn al-Musallam hám Milliy olimpiada komitetleri associaciyasınıń birinshi vice-prezidenti Shayx Javan bin Hamad Ol Soniydi qabılladı.

Sport tarawındaǵı óz-ara paydalı birge islesiwdi bunnan bılay da keńeytiw, olimpiada háreketin qollap-quwatlaw, elimizde professional hám ǵalabalıq sporttı rawajlandırıw ushın sharayatlar jaratıwdıń áhmiyetli máseleleri kórip shıǵıldı.
Ushırasıw basında Shayx Javan bin Hamad Ol Soniy Ózbekstan jetekshisine Qatar Ámiri Shayx Tamim bin Hamad Ol Soniydiń sálemin hám eń jaqsı tileklerin jetkerdi.
Bul xalıqaralıq sport shólkemleri menen ámeliy birge islesiw joqarı dárejege kóterilgeni qanaatlanıwshılıq penen atap ótildi.
Pútkil jer júzilik júziw federaciyası menen sheriklikti bekkemlew, qánigeler tayarlaw boyınsha baǵdarlamalardı ámelge asırıw, sonday-aq, Ózbekstanda suw sportı túrleri ushın zamanagóy hám qolaylı infrastruktura jaratıwǵa ayrıqsha itibar qaratıldı.
Mámleketimizde iri xalıqaralıq jarıslar, Aziya Olimpiada keńesi Assambleyasınıń májilisi hám Olimpiada komitetleri associaciyasınıń iri ilajların ótkeriw máseleleri de dodalandı.

ÓzA