Mámleketimiz basshısına kámbaǵal shańaraqlardı qollap-quwatlaw, mayıplıǵı bolǵan shaxslardıń bántligin támiyinlew, sociallıq xızmetlerdi qamtıp alıwdıń túrlerin keńeytiw ilajları boyınsha málimleme berildi.

Mámleketimizde mútáj insanlar ayrıqsha itibarǵa alınıp, máteriallıq hám ruwxıy jaqtan qollap-quwatlanbaqta. “Kámbaǵallıqtan abadanlıqqa qaray” baǵdarlaması tiykarında bunday shańaraqlarǵa bántlik, bilimlendiriw, densawlıqtı saqlaw sıyaqlı tarawlarda járdem berilmekte.
Sonıń menen birge, bul júdá keń hám úzliksiz process bolıp, turaqlı jetilistiriliwdi talap etedi. Sonıń ishinde, kámbaǵal shańaraqlardı olardıń sociallıq-ekonomikalıq jaǵdayına qarap, úsh kategoriyada qollap-quwatlaw usınıs etilmekte.
Kem támiyinlengen shańaraqlarǵa 100 den aslam túrdegi sociallıq xızmet, járdem hám jeńillikler beriledi. “Kámbaǵal shańaraqlar reestri”ne kirgiziw tártip-qaǵıydaları nızamshılıq hújjeti dárejesinde belgilenedi. Olardı kámbaǵallıqtan shıǵarıw boyınsha individual rejeler tastıyıqlanıp, mánzilli xızmet hám járdemler kórsetiledi. Bunday insanlardıń bántligin sheklewshi faktorlar saplastırılıp, belgili bir dáramat tabıwına sharayat jaratıladı.
Járdemge mútáj shańaraq perzentleri mekteptegi uzaytılǵan kún toparları ushın tólemnen azat etiledi, ayrıqsha bahalarǵa oqıǵanlar dem alıw oraylarında biypul dem alıwı múmkin boladı. Kámbaǵal shańaraqtan shıqqan ayrıqsha oqıwshı student-qızlarǵa bazalıq stipendiyanıń 2 esesi muǵdarında arnawlı stipendiya tólenedi.
Prezentaciyada mayıplıǵı bolǵan shaxslardıń bántligin támiyinlew ilajları haqqında da málimleme berildi.
Oǵan bola, mayıplıǵı bar insanlardı jumısqa alǵan jeńil sanaat kárxanalarına salıq jeńilliklerin beriw, bunday xızmetkerler ushın sociallıq salıq stavkasın azaytıw, isbilermenlerge Sociallıq qorǵaw mámleketlik qorı esabınan 500 million sumǵa shekem subsidiya ajıratıw sıyaqlı xoshametlewler názerde tutılmaqta.
Sonday-aq, elektron sawda maydanshası arqalı mayıplıǵı bolǵan shaxslarǵa tiyisli tovar hám xızmetlerdi satıp alıw muǵdarı arttırıladı. Olardı kásip-ónerge úyretiw ushın texnikumlarda inklyuziv bilimlendiriw toparları shólkemlestiriledi.
Basqalardıń kútimine mútáj shaxslarǵa sociallıq xızmetlerdiń qamtıp alıwın hám túrlerin keńeytiw maqsetinde “Belsendi turmısqa qádem” baǵdarlaması engiziledi. Baǵdarlama sheńberinde olar ushın kúndizgi qatnaw tiykarında yamasa úyde qaraw, turmıslıq jumıslarda járdemlesiw, toqtap qalǵan háreket aktivligin tiklew, keselliklerdiń aldın alıw sıyaqlı medicinalıq-sociallıq xızmetler jolǵa qoyıladı.
Mámleketimiz basshısı usınıslardı maqullap, olardı sistemalı jolǵa qoyıw hám orınlanıwın qadaǵalaw boyınsha kórsetpeler berdi.

ÓzA