26-28-aprel kúnleri Xiywa qalasında ótkerilgen IV Xalıqaralıq baqsıshılıq kórkem óneri festivalı qaraqalpaqstanlı mádeniyat xızmetkerleriniń ózin kórsetiwi ushın áhmiyetli maydan boldı.

Atap aytqanda, jer júziniń derlik barlıq aymaqlarınan talantlı baqsılar qatnasqan bul festivalda jas jırawımız Dáwrenbek Endirbaev, baqsılarımızdan Kuwanıshbay Seytembaev hám Miyassar Jumatovalar ózleriniń ónerlerin kórsetip, qaraqalpaq xalqınıń milliy qosıq hám dástanların dúnyaǵa tanıttı.
Festival juwmaǵında, Nókis qánigelestirilgen mádeniyat mektebiniń oqıtıwshısı, xalıqaralıq hám respublikalıq tańlawlardıń jeńimpazı, talantlı baqsı qızımız Miyassar Jumatova sıylı 1-orındı iyeledi hám 5000 dollarlıq vaucher menen sıylıqlandı.
Festivaldıń Gran-Pri sıylıǵın bolsa, Ázerbayjannıń «Ashıqlar» toparı jeńip alıwǵa eristi.

Adilbay Orazov,
Qaraqalpaqstan xabar agentligi sholıwshısı