Qaraqalpaqstan Respublikası Densawlıqtı saqlaw ministrligi tárepinen Respublikalıq qan quyıw stanciyasına ǵalaba xabar qurallarınıń wákilleri ushın press-tur shólkemlestirildi.

Onda Respublikalıq qan quyıw stanciyasınıń bas shıpakeri wazıypasın waqtınsha atqarıwshısı G.Abdraxmanova tarawda ámelge asırılıp atırǵan jumıslar, jańalıqlar tuwralı keń túrde maǵlıwmat berdi.
Atap ótilgenindey, mámleketimiz tárepinen xalıqtıń densawlıǵın qorǵawǵa ayrıqsha itibar qaratılıp, xalıqqa medicinalıq xızmet kórsetiwde bir qatar unamlı jumıslar ámelge asırılmaqta. Ásirese, qan xızmetine jańa texnologiyalardıń kirip keliwi, qan donorlıǵı qáwipsizligin támiyinlew boyınsha normativlik-huqıqıy hújjetlerdiń jetilistiriliwi, zárúr nızamlı tiykarlardıń jaratılıwı bul xızmet túriniń rawajlanıwı ushın keń múmkinshiliklerdi payda etpekte.
Qaraqalpaqstan Respublikasında qan xızmeti Respublikalıq qan quyıw stanciyası hám emlew-profilaktikalıq mákemelerindegi 17 qan bankleri tárepinen ámelge asırıladı. Respublikalıq qan quyıw stanciyası tiyisli baǵdarlamalarǵa muwapıq kredit esabınan 1 mlrd. 257 mln sumlıq zamanagóy qan saqlaw ushın arnalǵan muzlatqıshlar, plazmaferez, gemocitoferez, laboratoriyalıq ásbap-úskeneler hám bir mártelik qollanba materiallar menen támiyinlendi. Sonday-aq, emlew-profilaktikalıq mákemeleri, qalalıq hám rayonlıq medicina birlespeleri quramındaǵı qan quyıw bólimleri (qan banki) arnawlı qan komponentlerin saqlaw ushın arnalǵan muzlatqıshlar menen úskenelendi.
– Respublikada qan jáne onıń komponentlerin tayarlaw, qayta islew hám tekseriw processlerin oraylastırıw jumısları da ámelge asırıldı,-deydi G.Abdraxmanova. – Yaǵnıy, aldın barlıq emlew-profilaktikalıq mákemelerindegi, qalalıq hám rayonlıq medicina birlespelerindegi qan quyıw bólimleri qan tayarlaw, qayta islew, tekseriw jumısların ámelge asıratuǵın bolsa, házirgi kúnde olardıń barlıǵı tayın qan komponentlerin saqlaw, qan komponentlerin nawqaslarǵa quyıw, donorlardı jıynaw hám ózlerinde bar tayar qan komponentleriniń rezervin saqlaw wazıypaların atqaratuǵın qan banklerine aylandırıldı.
Respublikamızda 2024-jıldıń juwmaǵı menen ulıwma donorlar sanı 6834 ge jetti. Turaqlı donorlarımızdıń hám ıqtıyarlılardıń qan quyıwǵa mútáj nawqaslarǵa berip atırǵan qalıs járdeminiń bahası joq, álbette.
Kadrlardıń dárejesin, bilimin, tájiriybelerin, mamanlıǵın arttırıw hám qayta tayarlaw boyınsha da bir qatar jumıslar islendi. Házirgi waqıtta qánigelikleri boyınsha barlıq shtat birligi (21 shtat) tolıqtırıldı. Sonnan 8 shıpaker gematologiya hám transfuziologiya qánigeligi boyınsha klinikalıq ordinaturanı hám 1 shıpaker magistraturanı tamamlaǵan.
Ilaj dawamında qatnasıwshılar qan quyıw stanciyasındaǵı shıpakerler hám qan tapsırıwǵa kelgen puqaralar ushın jaratılǵan sharayatlar menen tanısıp, qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi