Qıtay Pakistannıń házirgi waqıttaǵı qáweterin túsinedi hám Islamabadtı suvereniteti hám qáwipsizligi jolındaǵı mápin qorǵawda qollap-quwatlaydı, dedi QXR sırtqı isler ministri Van I pakistanlı kásiplesi Muhammed Ishaq Dar menen telefon arqalı sáwbette.

– Qıtay házirgi jaǵdaydıń rawajlanıwın dıqqat penen baqlap barmaqta,-degen ol óz uyımınıń rásmiy saytında járiyalanǵan bildiriwde. – Terrorizmge qarsı gúres dúnyadaǵı barlıq mámleketlerdiń ulıwma juwapkershiligi bolıp esaplanadı. Bul terrorizmge qarsı gúrestegi isenimli háreketinde Pakistandı mudamı qollap-quwatlaymız.
Muhammed Ishaq Dar óz gezeginde mámleketi dúnyanıń barlıq mámleketleri menen baylanısın dawam ettiretuǵının atap ótti.
Pakistan tárepiniń baslaması menen shólkemlestirilgen sáwbet waqtında mırza Dar kásiplesine Jammu hám Kashmirdegi terror háreketi sebepli payda bolǵan Hindstan menen tartıs haqqında maǵlıwmat berdi.
– Pakistan bárqulla terrorǵa qarsı gúreste isenimli qatnastı jaqlap, jaǵdaydı keskinlestiretuǵın hár qanday háreketke qarsı shıqqan,-dedi ol. – Waqıyalardı itibar menen baqlap barıw hám basqarıw niyetinde biz Qıtay hám xalıqaralıq jámiyetshilik penen birge islesiwdi dawam ettiremiz.
Qıtaylı diplomat Pekin Hindstan hám Pakistan jaǵdaydı jumsartıwına úmit etip atırǵanın ayttı.
– Qıtay imkanı bolǵanınsha tezirek ádil tergew ótkeriliwi tárepdarı,-dep sózin dawam ettirgen QXR sırtqı siyasat uyımınıń basshısı. – Tartıs hesh bir táreptiń mápine sáykes emes, kerisinshe regionallıq tınıshlıq hám turaqlılıqqa qarsı.
Házirgi waqıtta Kashmirdegi shegara sızıǵında jaǵday keskinliginshe qalmaqta. Hindstan armiyası tartqatqan bayanatta atap ótiliwinshe, Jammu hám Kashmir aymaǵındaǵı qadaǵalaw sızıǵı boylap Pakistan áskerleri tárepinen izbe-iz tórtinshi kún oq atıwdı toqtatıw qaǵıydası buzılǵan.
Haqıyqatında da, usı kúnleri kelispewshilik háwij alǵan. Pahalgam qalası janında, Baysaron oypatlıǵında bir neshe qurallanǵan adam at minip ketip baratırǵan turistlerge oq atqan. Hújim ushın juwapkershilikti «Lashkar-e-Tayba» terror shólkemine baylanıslı «Qarsılıq kórsetiw frontı» toparı moynına aldı. Apatshılıq aqıbetinde 25 hindstanlı hám bir Nepal puqarası qaytıs boldı.
Oǵan juwap retinde Hindstan Pakistanǵa qarsı bir qatar ilajlar qollandı. Yaǵnıy, áskeriy attasheler mámleketten shıǵarıp jiberildi. Hind suwı shártnaması toqtatıldı hám transshegaralıq baylanıs kóz qarasınan Attari qurǵaqlıq tranzit mánzili operativlik penen jabılatuǵını málim etildi. Sonday-aq, hind jerine ótiw ornı arqalı kirgen Pakistan puqaraları 1-mayǵa shekem mámleketten shıǵıp ketiwi kerek ekenligi aytıldı. Olarǵa Qubla Aziya regionallıq birge islesiw associaciyası (SAARK) vizasınan waz keshiw sxeması boyınsha qońsı mámleketke ótiw qadaǵan etildi. Bul sistema arqalı kirgenlerge shıǵıp ketiw ushın 48 caat waqıt berildi. Bunnan tısqarı Hindstan Pakistan puqaralarına viza beriwdi jedellik penen toqtattı. Vizalar 27-aprelden biykar etildi.

S.Rahimov, ÓzA