Elimizde baǵshılıqtıń eń áhmiyetli tarmaqlarınan biri júzimgershilik bolıp esaplanadı. Sebebi júzimgershilik ónimli, dáramatlı taraw.

Júzimniń sanaatta qolaylı sortların kóbeytiw, qayta islew, tarawǵa ilim jetiskenliklerin keńnen engiziw, eksport imkaniyatın arttırıw baǵdarında úzliksiz jumıslar ámelge asırılmaqta.
Atap aytqanda, Awıl xojalıǵı ministrligi baspasóz xızmetiniń málim etiwinshe, jańa baǵ hám júzim atızların jaratıwshılarǵa 18 procentlik stavkada 7 jıllıq kredit beriledi, sonnan 3 jılı jeńilletilgen dáwir bolıp esaplanadı.
Atap ótiliwinshe, kredit basqıshpa-basqısh túrde jer tayarlaw (10 procent), nál hám egiw (40 procent), suwǵarıw sisteması (30 procent) hám tárbiyalaw (20 procent) ushın ajıratıladı. 1 gektarǵa eń kóbi menen BEMniń 500 esesine shekem kredit beriliwi názerde tutılǵan.
Maǵlıwmatlarǵa bola, júzim maydanları boyınsha Ispaniya, Franciya, Qıtay, Italiya, Túrkiya jetekshi 5 mámleket qatarınan orın alǵan. Ózbekstan 181 mıń gektar júzim maydanları menen 7-orındı iyelegen. Ónimdarlıq boyınsha bolsa Hindstan, Qıtay, AQSh, JAR, Ózbekstan jetekshi bolıp esaplanadı.
Júzimgershilikti rawajlandırıw ushın mámleketimizde jeterli imkaniyat bar.

Muhayyo Toshqoraeva, ÓzA