Usı jıl 29-aprel kúni Qaraqalpaqstan Respublikası Joqarǵı Keńesiniń tórtinshi sessiyası bolıp ótti.

Sessiyaǵa Ózbekstan Respublikası Oliy Majlisi Senatı aǵzaları, ministrlikler hám taraw basshıları, deputatlar hám ǵalaba xabar qurallarınıń wákilleri qatnastı.
Sessiyanı Qaraqalpaqstan Respublikası Joqarǵı Keńesiniń Baslıǵı A.Orınbaev basqarıp bardı.
Sessiya kún tártibindegi dáslepki másele «Qaraqalpaqstan Respublikasınıń ayırım nızamlarına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Jergilikli hákimiyattıń wákillikli hám puqaralardıń ózin-ózi basqarıw uyımları hám de mámleketlik uyımlardıń ashıq-aydınlıǵın támiyinlew máseleleri komiteti baslıǵı Sh.Otemisov bayanat jasadı.
Bul Nızam 5 statyadan ibarat bolıp, Qaraqalpaqstan Respublikasınıń 2013-jıl 5-iyuldegi «Puqaralardıń ózin-ózi basqarıw uyımları haqqında»ǵı hám Qaraqalpaqstan Respublikasınıń 2019-jıl 27-marttaǵı «Puqaralar jıyını baslıǵın saylaw haqqında»ǵı Nızamlarına ózgerisler menen qosımshalar kirgizilmekte.
Kún tártibindegi dáslepki másele tolıq kórip shıǵıldı hám deputatlar tárepinen tiyisli qarar qabıl etildi.
Kún tártibindegi keyingi másele Qaraqalpaqstan Respublikası Joqarǵı Keńesiniń Sanaat, qurılıs, transport hám málimleme texnologiyaları máseleleri komiteti tárepinen ámelge asırılıp atırǵan jumıslar haqqında Joqarǵı Keńestiń Sanaat, qurılıs, transport hám málimleme texnologiyaları máseleleri komitetiniń málimlemesi tuwralı bolıp, bul másele boyınsha komitet baslıǵı I.Sdikov bayanat jasadı.
Atap ótilgenindey, komitet tárepinen búgingi kúnge shekem sanaat, qurılıs, transport hám energetika tarawın rawajlandırıw, qayta tikleniwshi energiya dereklerinen paydalanıwdı keńnen en jaydırıw, «jasıl energiya»nıń úlesin arttırıw baǵdarında xalıqtı qıynap atırǵan mashqalalardı sheshiw boyınsha bir qatar jumıslar ámelge asırıldı. Sonday-aq, Prezidentimiz tárepinen qabıl etilgen qararlar, belgilep berilgen wazıypalardıń orınlanıwın támiyinlew ilajları kórilip, bul jumıslar dawam etpekte. Sonıń menen birge, tiyisli Prezidium qararları qabıl etildi. Komitetke aǵza deputatlar tárepinen aymaqlarda xalıqtı qıynap kiyatırǵan máseleler boyınsha ministrlik, mákeme hám shólkemlerge deputatlıq sorawlar jiberilip, mashqalalarǵa unamlı sheshim tabıw ilajları kórildi.
Kún tártibindegi másele tolıq kórip shıǵılıp, deputatlar tárepinen tiyisli qarar qabıl etildi.
Kún tártibindegi keyingi másele jaslardı ilimge kızıqtırıw hám ilimiy jumısqa tartıw boyınsha bilimlendiriw mákemelerinde alıp barılıp atırǵan jumıslar haqqında bolıp, bul másele boyınsha Ministrler Keńesi Baslıǵınıń orınbasarı B.Otemuratov bayanat jasadı. Bul másele de tolıq kórip shıǵıldı hám deputatlar tárepinen qarar qabıl etildi.
Sessiya májilisinde Joqarǵı Keńes Prezidiumınıń tiyisli qararları tastıyıqlandı.
Usınıń menen Qaraqalpaqstan Respublikası Joqarǵı Keńesiniń tórtinshi sessiyası óz jumısın juwmaqladı.

Qaraqalpaqstan xabar agentligi.