Global statistika siyasatın qáliplestiriw, milliy tájiriybe hám reformalarǵa baylanıslı jetiskenliklerdi kórsetiw, sırt el tájiriybelerin úyreniw baǵdarında elimizde nátiyjeli jumıslar shólkemlestirilip kelinbekte. Bul baǵdarda xalıqaralıq birge islesiwdi bekkemlew arqalı jáne de keń imkaniyatlarǵa jol ashıladı.

Birlesken Milletler Shólkemi Statistika komissiyasınıń Nyu-York qalasında bolıp ótken 2026-2029-jıllarǵa aǵza mámleketlerdi saylaw procesinde Ózbekstan birinshi márte usı uyımnıń aǵzası etip bir awızdan saylandı.
– Ózbekstan Respublikası Milliy statistika komitetiniń baslıǵı Behzod Hamroevtiń basshılıǵında 22-aprel kúni BMSh Statistika departamenti direktorı Stefan Shvaynfest penen ushırastıq, – deydi Statistika komitetiniń Xalıqaralıq qatnasıqlar hám reytingler menen islesiw bóliminiń baslıǵı Uluǵbek Noipov. – Onda Ózbekstanda statistika sistemasın jetilistiriw, Milliy statistika komitetin transformaciyalaw máseleleri, atap aytqanda, metodikalardı xalıqaralıq shólkemlerdiń principleri hám usınısları menen sáykeslendiriw sıyaqlı máselelerdi dodaladıq.
Tarawda xızmetkerlerdiń mamanlıǵın arttırıw, xalıqtı hám awıl xojalıǵın dizimge alıw ilajların ótkeriw sıyaqlı temalar ortaǵa taslandı. Ushırasıwda Stefan Shvaynfest Ózbekstan BMSh Statistika komissiyasına birinshi márte aǵza bolǵanın atap ótti.
– Statistika komissiyasına aǵza bolıw Ózbekstanǵa qanday imkaniyatlar beredi?
– Statistika komissiyasına tolıq aǵza bolıw Ózbekstan ushın global statistika siyasatın qáliplestiriwde qatnasıw, milliy tájiriybe hám reformalarǵa baylanıslı jetiskenliklerdi kórsetiw, aldınǵı sırt el tájiriybelerin úyreniw hám xalıqaralıq birge islesiwdi bekkemlew ushın keń imkaniyatlar ashıp beredi. Búgingi kúnde Komissiya 24 mámleketten ibarat bolıp, universal statistika standartlarına hám metodologiyalıq principlerge baylanıslı jumıslardı muwapıqlastıradı. Oǵan mámleketler tórt jılda bir márte geografiyalıq bólistiriwdi esapqa alıp saylanadi.
Maǵlıwmat ornında aytıw múmkin, Xalıqaralıq statistika tarawınıń rawajlanıwın belgilep beretuǵın bul húkimetleraralıq shólkem 1947-jılı BMShtıń Ekonomikalıq hám sociallıq keńesi (ESK) tárepinen funkcional uyım sıpatında jumıs baslaǵan.

A.RUSTAMOV, ÓzA