Búgingi kúnde balalardı hár qıylı kórinistegi zorlıqtan qorǵaw boyınsha bir qatar ilajlar ámelge asırılmaqta. Biraq soǵan qaramastan, balalardıń huqıqların jáne de isenimli qorǵaw zárúrligi bar.

Oliy Majlis Nızamshılıq palatasınıń gezektegi májilisinde “Balalardı zorlıqtan qorǵaw sistemasınıń jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam joybarı ekinshi oqıwda kórip shıǵıldı.
– Búgingi kúnde huqıqtı qollanıw ámeliyatında balalardıń huqıqları, erkinlikleri hám nızamlı mápleriniń isenimli qorǵalıwın támiyinlewge baylanıslı bir qatar mashqalalar bar, -dedi deputat A.Shodmanov. – Atap aytqanda, jınayattan jábirlengen balalardıń huqıqların qorǵaw, balalardı jınayat procesine gúwa sıpatında tartıwda olardıń huqıqların kepillew sistemasın jetilistiriw talap etiledi. Bul nızam joybarı menen Ózbekstan Respublikasınıń Jınayat hám Hákimshilik juwapkershilik haqqındaǵı kodekslerine balalardı jınısıy zorlıqtan qorǵaw, balalar súwretlengen pornografiyalıq ónimlerdi saqlaǵanı ushın juwapkershilik belgilewdi názerde tutatuǵın ózgerisler kirgizilmekte. Sonday-aq, Ózbekstan Respublikasınıń Jınayat-processual kodeksine jas óspirim gúwalardı tergew múddetlerin anıq belgileytuǵın ózgeris kirgiziw usınıs etilmekte.
Statyalardı dodalaw dawamında deputatlar tárepinen bir qatar sorawlar hám usınıslar berildi. Qızǵın pikir-talaslarda nızam joybarınıń ayırım normaların jetilistiriw zárúrligi aytıldı. Usı maqsette joybar juwapker komitet tárepinen jáne de jetilistiriletuǵın boldı.

Muhtarama Komilova, ÓzA