Prezident Vladimir Putin Arqa Koreya áskerleri Rossiya tárepinde turıp urısta qatnasıp atırǵanın birinshi márte tán aldı, dep jazdı CNN.

Moskva Kurskti pútkilley qaytarıp alǵanın járiyalanǵanınan eki kún ótip berilgen bildiriwde bılay delingen:
– Koreyalı doslarımız tilekleslik, ádillik hám shın júrekten jaqınlıq sezimi menen háreket etti. Biz benen iyinles turıp Watanımızdı óz jurtınday qorǵaǵan áskerlerdiń qaharmanlıǵına, joqarı dárejedegi arnawlı tayarlıǵı hám pidayılıǵına húrmet kórsetemiz.
Ukraina rásmiyleri hám Batıs razvedka xızmeti tárepinen aldınıraq 12 000 ǵa shamalas KXDR áskeriy xızmetkeri RF ǵa jiberilgeni atap ótilgen edi. Bul xabarǵa qosımsha túrde mart ayında Qubla Koreya áskerleri jáne 3000 arqa koreyalı ásker, sonday-aq, júdá kóp muǵdardaǵı qısqa aralıqqa ushatuǵın ballistikalıq raketa, júzlegen dana 170 millimetrli ózi júretuǵın qurılmalar, 240 millimetrli raketa kompleksi oq atıw úskenesi jiberilgenin málim etti.

Qaraqalpaqstan xabar agentligi