Xalıq awız-eki dóretiwshiliginiń eń áyyemgi túrlerinen bolǵan baqsıshılıq kórkem óneri gumanizm ideyaların, tınıshlıq hám doslıq, ádillik hám haqıyqatlıq sıyaqlı iygilikli pazıyletlerdi jırlaydı. Sonıń ushın da, baqsı, aqın hám jırawlar ázelden xalıq kewiliniń jırshıları, hár qıylı millet hám xalıqlardı birlestiretuǵın ullı insanlar sıpatında ardaqlap kelinedi.

Mámleketimizde basqa kórkem óner túrleri sıyaqlı baqsıshılıq kórkem ónerine de ayrıqsha itibar qaratılmaqta.
Onı Ózbekstan Respublikası Prezidentiniń 2018-jıl 1-noyabrdegi «Xalıqaralıq baqsıshılıq kórkem óner festivalın ótkeriw haqqında»ǵı qararı tiykarında hár eki jılda bir márte ótkerilip atırǵan Xalıqaralıq baqsıshılıq kórkem óneri festivalı mısalında da kóriw múmkin. Festivalǵa qamtıp alıw jıldan-jılǵa keńeyip barmaqta.
Bıyıl 26-28-aprel kúnleri Xorezmde bolıp ótken IV Xalıqaralıq baqsıshılıq kórkem óneri festivalında dúnyanıń 40 tan aslam mámleketlerinen 200 ge shamalas belgili baqsılar qatnastı.
Festivaldıń ashılıw máresiminde Ózbekstan Prezidenti Shavkat Mirziyoevtiń IV Xalıqaralıq baqsıshılıq festivalı qatnasıwshılarına qutlıqlawın Prezident keńesgóyi Odil Abdurahmonov oqıp esittirdi.
Sol kúni ilaj kórkem óner sheberleri hám baqsı, aqın, jırawlardıń koncert baǵdarlaması menen juwmaqlandı.
IV Xalıqaralıq baqsıshılıq kórkem óneri festivalı sheńberinde «Ekinshi Túrkiy dúnya mádeniyatı forumı» hám «Jańa Ózbekstanda baqsıshılıq kórkem óneri: zamanagóy izertlewler hám perspektivalar» temasındaǵı xalıqaralıq ilimiy-ámeliy konferenciya ótkerildi.
Ánjuman sońında baqsıshılıq kórkem óneri perspektivası menen baylanıslı áhmiyetli rezolyuciya qabıllandı.
– Ózbek milliy baqsıshılıq hám dástanshılıq kórkem óneriniń biybaha úlgilerin qásterlep saqlaw hám rawajlandırıw, onı keńnen úgit-násiyatlaw, jas áwlad qálbinde usı kórkem óner túrine húrmet hám itibar sezimlerin kúsheytiw, hár qıylı xalıqlar arasındaǵı doslıq hám tuwısqanlıq baylanısların bekkemlew, dóretiwshilik birge islesiw, mádeniy-ruwxıy qatnasıqlar sheńberin xalıqaralıq kólemde jáne de keńeytiw maqsetinde 2019-jıldan berli Xalıqaralıq baqsıshılıq kórkem óneri festivalı ótkerip kelinbekte. Usı jılı ánjuman áyyemgi Xiywada bolıp ótpekte. Festivalda dúnyanıń 40 tan aslam mámleketlerinen wákillerdiń qatnasıp atırǵanı onıń abırayı joqarı ekenliginen dárek beredi,-deydi Ázerbayjan mádeniyat ministri Adil Kerimli.
– Tórtinshi xalıqaralıq baqsıshılıq kórkem óneri festivalı hám onıń sheńberindegi bul abıraylı xalıqaralıq ilajlardı áyyemgi hám biytákirar Xiywa qalasında ótkerip atırǵanımız biykarǵa emes. Xiywa tek ǵana ulıwma dúnya miyrasına tiyisli teńsiz tariyxıy estelikleri emes, al áyyemnen ilim, mádeniyat, kórkem óner, ádebiyattıń rawajlanıwında úlken orın iyelegen áhmiyetli mánzillerimizden biri ekenligi menen qádirli bolıp esaplanadı,-deydi Ózbekstan Respublikası mádeniyat ministri Ozodbek Nazarbekov. – Keyingi jılları tuwısqan úlkelerde shólkemlestirilip atırǵan iri ánjumanlar, olarda alǵa qoyılıp atırǵan pikir-usınıslar mánawiy birligimizdi támiyinlew, uqsas qádiriyatlarımızdı qásterlep saqlaw, xalıqlarımız arasındaǵı baylanıslardı jáne de bekkemlewge xızmet etip atırǵanın atap ótiw orınlı.
Festivaldıń xalıqaralıq tańlawın Ózbekstan, Vengriya, Ázerbayjan, Qazaqstan, Rossiya, Kuveyt, Mongoliya mámleketleri wákillerinen ibarat tóreshiler kollegiyası bahalap bardı.
Xalıqaralıq festival jeńimpazların sıylıqlaw maqsetinde aqshalay sıylıqlar belgilengen bolıp, gran pri iyesine – 7000 dollar, 1-2-3-orınlardı iyelegenler ushın sáykes túrde hár bir baǵdarda 2 nominaciya (Dástan atqarıwshılıǵı baǵdarı, Nama atqarıwshılıǵı baǵdarı) boyınsha 5 000, 3500, 2500 dollardan ajıratıldı.
Festival qatnasıwshıları tómendegi nátiyjelerdi kórsetti:
3-orınǵa – Ikxagvasuren Lkxamragcha (Mongoliya), Stepanova Aksiniya (Rossiya), Ahmedov Ziyodullo (Ózbekstan), 2-orınǵa – Abdullaev Usmonjan (Ózbekstan), Turikpen Kensulu (Qazaqstan), 1-orınǵa – Jumatova Muyassar (Ózbekstan), Túrkmenstan milliy baqsılar toparı (Túrkmenstan), Gran Pri sıylıǵına Ázerbayjannıń «Ashıqlar» toparı eristi.
Bunnan tısqarı, nominaciyalar boyınsha da qatnasıwshılar sıylıqlandı. Sıylıqlardı Ózbekstan Respublikası mádeniyat ministri Ozodbek Nazarbekov, Xorezm wálayatı hákimi Jwrabek Rahimov hám basqa da rásmiyler tapsırdı.
Xiywada ótkerilgen IV Xalıqaralıq baqsıshılıq kórkem óneri festivalı hár bir xalıqtıń ázeliy tariyxı hám mádeniyatı, bárinen burın, onıń awız-eki dóretiwshiligi folklor kórkem ónerinde, dástan hám eposlarında jámlengenin, olar millettiń ózligin ańlaw, onıń ózine tán milliy qádiriyatları hám dástúrlerin saqlaw hám rawajlandırıwda biybaha dárek ekenligin dálilledi.

Ahmadjan ShOKIROV,
ÓzAnıń xabarshısı