Taxtakópir rayonı Ózbekstan mákan puqaralar jıyını turǵını Bahadır Usakov bir neshe jıllardan berli, óziniń úy aldı qıytaq jerinen nátiyjeli paydalanıp kiyatırǵan miynetkesh insanlardıń biri bolıp tabıladı.

Házirgi waqıtta 22 sotıx úy aldı qıytaq jeriniń hár bir qarıs jerinen ónimli paydalanıp, onnan mol dáramat tawıp kelmekte.
-Aymaqtaǵı hákim járdemshisi Jańabay Ismamutov tárepinen Jáhán rawajlanıw bankiniń grant qarjıları tiykarında 1,5 sotıx jerge ıssıxana qurıp berildi,-deydi Bahadır Usakov.-Onda házirgi kúnleri qıyar hám pomidor jetistirip, ónimlerin rayonımızdıń bazarına shıǵarıp satpaqtamız. Házir kúnine ortasha 20-25 kg qıyar terip alınbaqta. Sonday-aq, 15 sotıx jerde miywe baǵı, ovoщ-palız jetistiretuǵın qıytaq jerim bar. Sonıń menen birge, úyimizde 300 bas tawıq, 2 bas sawın sıyır, shóje shıǵaratuǵın inkubaciya cexı bar. Bul inkubaciya úskenesinde hár jılı shóje shıǵarıp, xalıqtı qus ónimleri menen támiyinlep atırmız. Al, 10 uyada baǵılıp atırǵan pal hárreleri tárepinen jetistirilgen paldıń bolsa, qarıydarı oǵada kóp.
-2023-jılı jáhán rawajlanıw bankiniń 150 mıń dollarlıq grantın jeńip alıp, jıyın aymaǵındaǵı 30 xojalıqtı zamanagóy ıssıxanalar menen támiyinledik,-deydi aymaqtaǵı hákim járdemshisi Jańabay Ismamutov.-Házirgi waqıtta usı xojalıqlardıń barlıǵında ıssıxanalar islep tur. Álbette, bul olarǵa shańaraqlarǵa qosımsha dáramat tabıwda áhmiyetli orın tutpaqta.
Jaqında usı shańaraqta «Qıytaq jer-qosımsha dáramat dáregi» atamasında kórgizbeli seminar shólkemlestirildi.
Seminarǵa Qaraqalpaqstan Respublikası Ministrler Keńesi Baslıǵınıń  birinshi orınbasarı N.Erlepesov, Kámbaǵallıqtı qısqartıw hám bántlik ministri K.Azerbaev, Ózbekstan máhálleler assosaciyası Qaraqalpaqstan Respublikası basqarması baslıǵı S.Turmanov, rayon hákiminiń orınbasarları hám máhálle belsendileri qatnastı.
Ótkerilgen ilajda seminar qatnasıwshıları B.Usakovtıń shańaraǵında bolıp, úlgili qıytaq jer iyesiniń tájiriybesi menen tanıstı.
Seminar dawamında qıytaq jer iyesiniń tájiriybeleri hár tárepleme dodalanıp, bul úlgini barlıq máhállelerde keńnen en jaydırıw boyınsha juwapkerlerge tapsırmalar berildi.
-Ózimniń is-tájiriybemdi rayonımız boylap keń en jaydırıp atırǵanınan oǵada quwanıshlıman, -deydi Bahadır biz benen bolǵan sáwbetinde.-Sebebi, «Suw gáwhar-jer ǵáziyne» degenindey xalqımız jerlerimizden nátiyjeli paydalansa, olardıń shańaraǵı toq hám abadan boladı. Usınday toqshılıqtıń arqasında bolsa, perzentlerimiz baxıtlı turmısta jasaydı dep oylayman.
Bunday kórgizbeli seminarlar respublikamızdıń barlıq aymaqlarında bolıp ótpekte.

Adilbay Orazov,
Qaraqalpaqstan xabar agentligi sholıwshısı.