Ózbekstan Respublikası Prezidenti Shavkat Mirziyoev 28-aprel kúni Tashkent qalasında jumıs baslaǵan «INNOPROM. Oraylıq Aziya» besinshi xalıqaralıq sanaat kórgizbesine bardı.

Kórgizbe «Central Asian Expo Uzbekistan» kompleksinde ótkerilmekte. Ekspoziciyanıń ulıwma maydanı 18 mıń kvadrat metrden artıq. Onda Rossiya, Oraylıq Aziyadaǵı qońsı mámleketler, Qıtay, Hindstan hám basqa da mámleketlerden 10 mıńnan aslam delegatlar qatnaspaqta.
Kórgizbede mashina qurılısı, elektrotexnika, metallurgiya, ximiya sanaatı, transport, qurılıs, IT hám basqa tarmaqlardaǵı jetekshi kárxanalardıń texnologiyalıq sheshimleri, zamanagóy úskeneleri hám tayar sanaat ónimleri kórsetilmekte.
Pavilonlar hám ekspoziciyalardı kózden ótkeriw waqtında mámleketimiz basshısı ekonomikalıq kooperaciya ushın úlken imkaniyat hám jańa biznes ideyalar islep shıǵıw ushın jaqsı imkaniyatlar bar ekenligin ayrıqsha atap ótti.
Forum jańa iri joybarlardı ámelge asırıwǵa pát baǵıshlap, uzaq múddetli sheriklik baylanısların rawajlandırıw hám aymaqlararalıq birge islesiwdi keńeytiwge xızmet etetuǵınına isenim bildirildi.
Ilaj sheńberinde Ózbekstan Prezidenti Rossiya Húkimeti Baslıǵınıń birinshi orınbasarı Denis Manturov basshılıǵındaǵı delegaciya menen ushırasıwlar ótkerdi.
Rossiya delegaciyası basshısı Prezidentimizge Rossiya Federaciyası Prezidenti Vladimir Putinniń sálemi hám eń jaqsı tileklerin jetkerdi.
Ótken jılı may ayında Rossiya Prezidentiniń Ózbekstanǵa mámleketlik saparı juwmaǵında erisilgen kelisimlerdi ámelge asırıw máseleleri kórip shıǵıldı.
Tovar almasıwdıń ósiw páti saqlanıp qalmaqta, eki mámleket aymaqların jedel tartqan halda áhmiyetli kooperaciyalıq joybarlar hám baǵdarlamalardı ámelge asırıw, sonıń ishinde «Innoprom» forumı sheńberinde óz-ara muwapıqlasqan sheshimlerdi islep shıǵıw zárúr ekenligi atap ótildi.
Tatarstan Baslıǵı Rustam Minnixanov penen ushırasıwda jetekshi kárxanalardıń sanaat kooperaciyasın hám jedel gumanitarlıq almasıwdı keńeytiw máseleleri dodalandı.
Jedel sóylesiwlerdi dawam ettiriw, neft-gaz, ximiya, transport, turizm hám basqa da tarawlarda, sonıń ishinde, Ózbekstan aymaqlarındaǵı sanaat zonaları sheńberinde birgeliktegi joybarlardı ámelge asırıwǵa kelisip alındı.
«Rosatom» mámleketlik korporaciyası bas direktorı Aleksey Lixachev penen sáwbette tınısh atom tarawındaǵı birge islesiw jedel rawajlanıp atırǵanı atap ótildi.
Awıl xojalıǵı hám medicinada yadro texnologiyaların qollanıw tarawındaǵı birge islesiwdi rawajlandırıw, sonday-aq, Tashkent qalasındaǵı «MIFI» filialı negizinde kadrlar tayarlaw máselelerine ayrıqsha itibar qaratıldı.
Sonday-aq, mámleketimiz basshısı dógerek sáwbetinde qatnastı. Onda eki mámleket aymaqları hám jetekshi kompaniyalarınıń basshıları kooperaciyalıq joybarlardı ámelge asırıw boyınsha anıq rejelerdi tanıstırdı.

ÓzA