Kegeyli rayonı Iyshan qala awıl puqaralar jıyınındaǵı «Yulduz» fermer xojalıǵında 2025-jıldıń zúrááti ushın shigit egilgen maydanlarda agrotexnikalıq ilajlardı ámelge asırıw, sonday-aq, kultivaciyalaw, azıqlandırıw, bioónim jetistiriwge baǵıshlanǵan kórgizbeli seminar shólkemlestirildi.

Ótkerilgen seminarǵa rayon hákimi A.Kamalov, fermerler, klasterler, tarawǵa juwapker basshılar hám qánigeler qatnastı.
Seminarda shigit egilgen maydanlardıń jaǵdayı, agrotexnikalıq ilajlardı óz waqtında hám sapalı orınlawdıń áhmiyeti, sonday-aq, zamanagóy agrotexnika usıllarınan paydalanıwdıń artıqmashılıqları talqılandı.
Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev óz sózinde awıl xojalıǵı tarawında innovaciyalıq texnologiyalardı engiziw zárúrligi, zamanagóy texnologiyalardı qollanıw, suwǵarıw sistemaların jetilistiriw arqalı atızlarda ónimdarlıqtı arttırıw hám sapalı ónim jetistiriw múmkin ekenligin atap ótti.
Seminar dawamında fermerlerge ǵawashalardı kultivaciyalaw, azıqlandırıw, bioónim jetistiriw hám basqa da agrotexnikalıq jumıslardı durıs orınlaw boyınsha ámeliy másláhátler berildi.
Óz gezeginde Kegeyli rayonı hákimi A.Kamalov fermerlerge ayırım mashqalalar júzege kelgende mámleket tárepinen kórsetiletuǵın járdem hám qollap-quwatlaw haqqında maǵlıwmat berdi.
Seminar awıl xojalıǵı tarawında innovaciyalıq texnologiyalardı engiziwge qaratılǵan áhmiyetli qádem bolıp, keleshekte bul tarawda jáne de úlken jetiskenliklerge erisiwge múmkinshilik beredi.

Adilbay Orazov,
Qaraqalpaqstan xabar agentligi sholıwshısı.