28-aprel – Pútkil jer júzilik miynetti qorǵaw kúni

Ózbekstan kásiplik awqamları Federaciyası Qaraqalpaqstan Keńesi tárepinen Berdaq atındaǵı Qaraqalpaq mámleketlik universitetinde 28-aprel – Pútkil jer júzilik miynetti qorǵaw kúnine baǵıshlanǵan «Miynetti qorǵawdıń jańa basqıshı: jumıs ornında jasalma intellekt hám sanlastırıwdıń roli» atamasında ilaj ótkerildi.
Oǵan Ózbekstan kásiplik awqamları Federaciyası, Sanaat, radiaciya hám yadro qáwipsizligi komiteti Qaraqalpaqstan aymaqlıq bólimi, Bas shıpakerlik-sociallıq ekspertizası, Qaraqalpaqstan Respublikası Bántlik hám kámbaǵallıqtı qısqartıw ministrligi, Ayrıqsha jaǵdaylar basqarması, kárxana, mákeme hám shólkem xızmetkerleri qatnastı.
Ilaj miynetti qorǵawda paydalanılatuǵın kórgizbeli qurallar menen tanısıw menen baslandı. Soń sánege baǵıshlanǵan dógerek sáwbeti ótkerildi.
Maqset – miynetti qorǵaw tarawında jasalma intellekt hám sanlastırıwdı sistemalı tárizde jolǵa qoyıw bolıp esaplanadı. Jasalma intellekt insan miynetin jeńillestiriwde, nátiyjelikti arttırıwda hám jańa imkaniyatlar jaratıwda áhmiyetli rol atqaradı.
Ilaj jasalma intellektten sistemalı túrde paydalanǵan halda xızmetkerlerge qáwipsiz miynet sharayatların jaratıw, olardıń miynetin jeńilletiw, óndiris penen baylanıslı baxıtsız hádiyselerdiń aldın alıw sıyaqlı miynetti qorǵaw tarawında hám turmıslıq áhmiyetke bolǵan jaǵdaylar boyınsha soraw-juwaplar hám pikir alısıwlarǵa bay boldı.
Ilajda Ózbekstan kásiplik awqamları Federaciyası Qaraqalpaqstan Keńesiniń baslıǵı U.Jalmenov, Ózbekstan kásiplik awqamları Federaciyası Shólkemlestiriw bólimi baslıǵınıń orınbasarı J.Ixtiyarov hám basqalar shıǵıp sóylep, insandaǵı intellekttiń tiykarǵı jemisi bolǵan jasalma intellektten mámleketimizde de paydalanılıp atırǵanın atap ótti.
Oǵan mámleketlik xızmetlerdi kórsetiwde jasalma intellektten paydalanıp atırǵanlıǵın mısal etip keltiriwimiz múmkin.
Xalıqqa onlayn xızmetlerdi usınıw hám 24/7 rejiminde mámleketlik xızmetlerge baylanıslı sorawlarǵa juwap alıw imkaniyatların jaratıw boyınsha nátiyjeli jumıslar alıp barılmaqta.
Dógerek sáwbetiniń juwmaǵında Ózbekstan kásiplik awqamları Federaciyası Prezidiumınıń arnawlı qararına muwapıq, miynetti qorǵaw hám qáwipsizlik boyınsha jámiyetlik qadaǵalawdı shólkemlestiriw boyınsha Respublikalıq tańlawdıń Qaraqalpaqstan Respublikası basqıshında jeńimpaz bolǵanlar bahalı sawǵalar hám diplomlar menen sıylıqlandı.

Á.Jiyemuratov,
Qaraqalpaqstan xabar agentligi