Evropa Awqamı Ózbekstanda 5 baslamanı iske túsirdi
Evropa Awqamınıń Ózbekstandaǵı delegaciyası “Evropa Awqamınıń Ózbekstandaǵı puqaralıq jámiyeti shólkemlerin qollap-quwatlaw” baslaması sheńberinde bes jańa puqaralıq jámiyeti joybarların iske túsirdi.
Usı múnásibet penen shólkemlestirilgen ilajda Evropa Awqamınıń Ózbekstandaǵı elshisi Toyvo Klaar, Insan huqıqları boyınsha Ózbekstan Respublikası Milliy orayınıń direktorı Akmal Saidov hám basqalar tárepler arasındaǵı birge islesiw puqaralıq jámiyetiniń jumısında áhmiyetli ekenin hám bul baslamalardıń iske qosılıwı usı processti qollap-quwatlawǵa qaratılǵanın atap ótti.
Atap ótilgenindey, ulıwma bahası derlik 2,9 million evroǵa teń bolǵan bul baslamalar Evropa Awqamı hám onıń birge islesiwshi shólkemleri tárepinen birgelikte qarjılandırılmaqta. Bul bolsa Ózbekstanda ámelge asırılıp atırǵan reformalar baǵdarlamasın qollap-quwatlawǵa xızmet etedi. Joybarlar puqaralıq jámiyetiniń siyasat boyınsha sóylesiwine qatnasıwı, gender teńligi, yuridikalıq huqıqlar menen imkaniyatlardı keńeytiw, media sawatlılıq hám sanlı huqıqlar tarawlarındaǵı úlesin bekkemlewge qaratılǵan.
– Búgin ilaj múnásibeti menen shólkemlestiriwshilerge minnetdarshılıq bildiremen, – dedi Insan huqıqları boyınsha Ózbekstan Respublikası Milliy orayınıń direktorı Akmal Saidov. – Ózbekstanda puqaralıq jámiyetin rawajlandırıwǵa qaratılǵan 5 joybardıń prezentaciyası haqıyqatında da tariyxıy waqıya bolıp esaplanadı. 4-aprel kúni Samarqandta Evropa Awqamı – Oraylıq Aziya birinshi sammiti ótkerildi. Qısqa múddette EA qatnasıwshıları tárepinen qol qoyılǵan birgeliktegi deklaraciyanıń eń áhmiyetli bántlerinen biri – puqaralıq jámiyeti institutların qollap-quwatlawǵa hám Oraylıq Aziya puqaralıq jámiyeti institutı forumına qaratılǵan búgingi ilajdı shólkemlestirdi. Bunday baslamalar tárepler arasındaǵı baylanıslardı bekkemlewge xızmet etetuǵının atap ótiw kerek.
Ilajda bul baslamalardı ámelge asırıwdıń ámeliy áhmiyetine itibar qaratıldı. Oǵan bola, puqaralıq jámiyetiniń belsendiligin kúsheytiw hám inklyuziv rawajlanıwdı xoshametlew maqsetinde islep shıǵılǵan bes baslama milliy qamtıp alıw menen bir qatarda maqsetli aymaqlıq jumıslardı da óz ishine aladı. Joybarlar Tashkent, Qaraqalpaqstan, Namangan, Samarqand, Qashqadárya, Surxandárya hám basqa da aymaqlarda yuridikalıq huqıq hám imkaniyatlardı keńeytiw, gender teńligi, jaslar hám media sawatlılıǵı jáne sanlı huqıqlar boyınsha háreketlerdi qollap-quwatlaw maqsetinde ámelge asırıladı.
Hár bir joybar Evropa hám Ózbekstan birge islesiwshi shólkemlerin birlestirip, jergilikli dárejede ózlestiriwdi kúsheytedi hám tarawlar arasındaǵı birge islesiwdi xoshametleydi. Joybarlar puqaralıq jámiyeti belsendileriniń potencialın arttıradı, qorǵawǵa mútáj toparlarǵa járdem beredi hám puqaralıq jámiyeti menen mámleketlik shólkemler arasında barlıq dárejede birge islesiwdi qollap-quwatlaydı.
– Jaqında bolıp ótken Evropa Awqamı – Oraylıq Aziya birinshi sammitinde qáliplesken ámeliy processti dawam ettirgen halda, búgingi joybarlardıń iske qosılıwı Evropa Awqamınıń Ózbekstandaǵı puqaralıq jámiyetin rawajlandırıw tárepdarı ekenin jáne bir márte kórsetpekte. Bul joybarlar puqaralıq belsendiler ushın ádil sudlaw, gender teńligi, media hám sanlı huqıqlar tarawlarında mazmunlı qatnasıw imkaniyatın jaratıw boyınsha ulıwma insanıylıq umtılısımızdı sáwlelendiredi, – dedi Evropa Awqamınıń Ózbekstandaǵı elshisi Toyvo Klaar.

Nasiba Ziyodullaeva,
ÓzAnıń xabarshısı