BMSh QK jıynalmaqta

BMSh Qáwipsizlik Keńesi 29-aprel kúni Ukraina krizisi boyınsha májilis ótkeredi, dep xabar berdi Rossiyanıń shólkemdegi turaqlı wákilxanası.
Ushırasıw siyshembi kúni Nyu-York waqtı menen saat 16:00 de bolıp ótedi.
RF missiyası atap ótkenindey, ilaj Batıs mámleketleriniń ótinishi boyınsha shólkemlestirilmekte.
Bitkoin 95 000 dollardan astı
Bitkoinnıń bahası juma kúni 2,5 procentke kóterilip, fevral ayınıń aqırınan berli birinshi márte 95 000 dollardan astı. Sawda kólemi eń iri kriptovalyuta birjası – «Binance»da bul baha 95 146,38 dollardı quradı.
20 dan aslam birja boyınsha ortasha bahanı tallaytuǵın «CoinMarketCap» maǵlıwmatı sonday.
Tramp: ekinshi múddettiń dáslepki 100 kúni júdá tabıslı ótti
AQSh Prezidenti Donald Tramp Aq úydegi ekinshi múddetiniń dáslepki 100 kúni oǵada tabıslı ótti, dep esaplaytuǵının atap ótti.
– Adamlar bul eń jaqsı birinshi ay, eń jaqsı ekinshi ay hám haqıyqatında da eń jaqsı úshinshi ay bolǵanın jazdı, – dedi ol «Time» jurnalına bergen intervyude. – Durıs, birden anıq juwmaq shıǵarıwǵa bolmaydı, sebebi ótiw dáwiri biraz waqıt talap etedi.
Shoygu: qurallanıw jarısı jańa basqıshqa kirdi
Dúnya qurallanıw jarısınıń jańa texnologiyalıq basqıshına jaqınlastı, dedi Rossiya Qáwipsizlik keńesiniń xatkeri Sergey Shoygu.
– Qural jarısı – kórinip turǵanınday, bul hesh qashan toqtaǵan emes, tek sapası ózgergen, – dedi ol RF QK ilimiy-ekspertlik keńesiniń májilisinde. – Dáslep ápiwayı, keyin yadro quralı payda boldı. Sońınan usı qural-jaraqtı jetkerip beriw ushın tasıwshı qurılmaǵa mútájlik payda boldı. Nátiyjede strategiyalıq raketa kúshleri jaratıldı, teńiz arqalı jetkerip beretuǵın qurallar payda boldı hám taǵı basqa. Házir gezektegi basqısh – jańa qural túrleri islep shıǵarılmaqta.
Nobel sıylıǵınıń laureatları
Putin hám Tramptı quralsızlanıwǵa shaqırmaqta
Tınıshlıq boyınsha Nobel sıylıǵın alǵan úsh shólkem Rossiya hám AQSh Prezidentleri Vladimir Putin hám Donald Trampqa xat jollap, yadrolıq quralsızlanıw boyınsha ilajlardı kelisiw ushın ushırasıw ótkeriwge shaqırdı, delinedi Yadro quralların biykarlaw boyınsha xalıqaralıq kampaniya (ICAN) baspasóz xabarında.
– Búgin dúnya eń qáwipli yadrolıq qáwip-qáterge dus kelmekte, – delingen xatta. – Qural rezervin keńeytiw bizdi qáwipten qorǵamaydı, tek apatshılıq qáwpin arttıradı.
Xatqa «Nihon Hidankyo» ICAN hám Yadro urısınıń aldın alıw boyınsha xalıqaralıq shıpakerler tárepinen qol qoyılǵan. Birge islesiwshilerdiń pikirinshe, jer júzindegi yadro qurallarınıń 90 procentine iye AQSh hám Rossiya global arsenaldı qısqartıwda sheshiwshi rol atqarıwı múmkin.
Orban: Vengriya EAdan shıǵıw niyetinde emes
Vengriya Bas ministri Viktor Orbannıń aytıwınsha, mámleket Evropa Awqamınan shıǵıw niyetinde emes, al onı ózgertiwge háreket etedi.
– Vengriya hám Polsha bir waqıtları «Evropa watanpárwarları» partiyası menen birgelikte EAǵa qosılǵan edi, – dep jazǵan Orban sociallıq tarmaqtaǵı betinde. – Endi biz qayta tiklew ushın bul strukturanı ózgertiw niyetindemiz. Sol dáwirde Bryussel byurokratları ózlerine emes, xalıqqa xızmet etken, aǵza mámleketlerdiń ishki siyasiy sóylesiwlerine aralaspaǵan.
EA Ukrainaǵa sırt el kúshlerin ornalastırıw talabın qoymaqta
Ukrainanı tártipke salıw boyınsha qarsı usınısta Evropa Awqamı mámleket aymaǵına sırt el kúshlerin ornalastırıw, qural-jaraq penen támiyinlew hám ámeliyattı jolǵa qoyıwda hesh qanday sheklew bolmawın talap etpekte, dep jazdı «Reuters» qolǵa kirgizilgen hújjetke súyenip.
Tayland policiyasınıń samolyotı teńizge quladı
Tayland milliy policiyası hawa bólimine qaraslı jeńil samolyot Bangkoktan 160 kilometr qublada jaylasqan CHa-Am kurort qalashası jaqınında teńizge quladı, dep xabar berdi «Thai PBS» telekanalı.
Qutqarıwshılardıń sózlerine qaraǵanda, waqıya ornında 5 adam qaytıs bolǵan, bir adam awır jaraqatlanǵan.
Samolyot operativ maqsette – xızmetkerler, júk, parashyutshiler, sonıń ishinde, policiya parashyut mektebi tıńlawshıların tasıwda paydalanılǵan.

S.Rahimov, ÓzA