Ózbekstanda Evropa Awqamı tárepinen qarjılandırılıp atırǵan mámleketlik xızmetlerdi kórsetiwdi jáne de jetilistiriwge qaratılǵan joybar iske qosıldı. Bul haqqında EAnıń mámleketimizdegi delegaciyasınıń baspasóz xızmeti xabar berdi.
Ulıwma bahası 4,9 million evrolıq joybarda BMSh Rawajlanıw baǵdarlaması hám Ózbekstan Ádillik ministrligi tiykarǵı birge islesiwshi esaplanadı.

Mámlekette, ásirese, awıllıq jerlerde hám sociallıq qorǵawǵa mútáj xalıqtıń mámleketlik xızmetlerden paydalanıwın ápiwayılastırıw, sanlastırıw hám nátiyjeliligin arttırıwǵa qaratılǵan joybar 2019-2024-jıllarda ámelge asırılǵan «Awıllıq jerlerde mámleketlik xızmetlerdi jaqsılaw hám basqarıw sistemasın jetilistiriw» joybarınıń tabıslı nátiyjelerine tiykarlanadı.
«Bul baslama mámleketlik xızmetlerdi insan mápleri orayına qoyǵan halda túp-tiykarınan ózgertiledi. Mámleketlik institutlardı nátiyjeli hám inklyuziv etip qáliplestiriw arqalı biz, bárinen burın, shetki aymaqlarda jasaytuǵın xalıqtıń turmıs sapasın jaqsılaymız», – deydi BMSh Rawajlanıw baǵdarlamasınıń Ózbekstandaǵı turaqlı wákili Akiko Fujii xanım.
Ádillik ministri Akbar Toshqulovtıń atap ótiwinshe, «Bul baslama Jańa Ózbekstannıń Rawajlanıw strategiyasınıń ajıralmas bólegi bolıp esaplanadı. Onıń maqseti – puqaralarǵa jedel, ashıq-aydın hám arzan xızmetler kórsetiwdi támiyinlew bolıp esaplanadı. Tiykarǵı princip – hesh kimdi itibardan shette qaldırmaw».
«Jaqında Samarqandta bolıp ótken Evropa Awqamı – Oraylıq Aziya birinshi sammitiniń juwmaqlarına bola, biz usı jańa baslama ulıwma ústinliklerimiz – sanlastırıwdı rawajlandırıw, basqarıw sistemasın bekkemlew hám mámleketlik xızmetlerdiń jáne de qolaylıraq, jáne de nátiyjeli hám hár bir Ózbekstan puqarasınıń mútájliklerine juwap beriwin támiyinlewine isenemiz», – deydi EAnıń Ózbekstandaǵı delegaciyası birinshi másláhátshisi hám birge islesiw bólimi baslıǵı Vim Riepma.
Joybar mámleketlik xızmetlerdi kórsetiw milliy sistemasınıń bek-ofisin shólkemlestiriwshi institucional, huqıqıy hám normativlik tiykarların jetilistiriw, mámleketlik xızmetlerdi kórestiwde bek-ofislerdiń potencialın arttırıp, olardıń milliy, regionallıq hám jergilikli dárejede nátiyjeli jumısın támiiynlew, bek-ofislerdiń sanlı hám paydalanıwshıǵa baǵdarlanǵan transformaciyasın ámelge asırıw hám aymaqlıq hám jergilikli bek-ofisleriniń jedelligi, esap-sanaqlıǵı hám nátiyjeli islesiwin támiyinlew ushın jergilikli basqarıw sistemasın ózgertiw sıyaqlı tórt strategiyalıq baǵdardı qamtıp aladı.
Shólkemlestiriwshilerge bola, 2029-jıldıń juwmaǵında joybar sheńberinde 11 bek-ofis mákemesin funkcional tallaw ótkeriledi, 1000 mámleketlik xızmetker inklyuziv hám paydalanıwshılarǵa baǵdarlanǵan xızmetler kórsetiw boyınsha oqıtıladı, keminde 35 mámleket xızmeti sanlı transformaciyalanadı, mámleket boylap 34 jańa mámleket xızmetleri múyeshleri shólkemlestriledi.
Usı keń kólemli baǵdarlama puqaralardıń mámleketlik xızmetlerinen nátiyjeli, ashıq-aydın hám inklyuziv paydalanıw xızmetlerin arttırıwı kútilmekte.

Qaraqalpaqstan xabar agentiligi