Xiywa qalasında IV Xalıqaralıq baqsıshılıq kórkem óner festivalınıń ashılıw máresimi bolıp ótti.

Xalıq awız-eki dóretiwshiliginiń eń áyyemgi túrlerinen bolǵan baqsıshılıq kórkem óneri joqarı gumanizm ideyaların, tınıshlıq hám doslıq, ádillik hám haqıyqatlıq sıyaqlı iygilikli pazıyletlerdi sheberlik penen jırlaydı. Sonıń ushın da, baqsı, aqın hám jırawlar ázelden xalıq kewliniń jırshıları, hár qıylı millet hám xalıqlardı birlestiretuǵın ullı insanlar sıpatında ardaqlap kelinedi.

Mámleketimizde basqa kórkem óner túrleri sıyaqlı baqsıshılıq kórkem ónerine de ayrıqsha itibar qaratılmaqta.

Onı Ózbekstan Respublikası Prezidentiniń 2018-jıl 1-noyabrdegi «Xalıqaralıq baqsıshılıq kórkem óner festivalın ótkeriw haqqında»ǵı qararı tiykarında hár eki jılda bir márte ótkerilip atırǵan Xalıqaralıq baqsıshılıq kórkem óneri festivalı mısalında da kóriw múmkin. Festivalǵa qamtıp alıw jıldan-jılǵa keńeyip barmaqta.

Ózbekstan Prezidenti Shavkat Mirziyoevtiń IV Xalıqaralıq baqsıshılıq festivalı qatnasıwshılarına qutlıqlawın Prezident keńesgóyi Odil Abdurahmonov oqıp esittirdi.

Bıyıl 26-28-aprel kúnleri ótetuǵın festivalda dúnyanıń 40 tan aslam mámleketlerinen belgili baqsılar qatnaspaqta.

Ilaj kórkem óner sheberleri hám baqsı, aqın, jırawlardıń koncert baǵdarlaması menen juwmaqlandı.

Ahmadjan Shokirov, Behzod Saidov (súwret), ÓzAnıń xabarshıları