Sociallıq tarmaqlarda Ózbekstan puqaralarınıń Birlesken Arab Ámirliklerine kiriwi qadaǵan etilgeni haqqında tarqalıp atırǵan xabarlar tiykarsız hám feyk bolıp esaplanadı, dep jazbaqta Sırtqı isler ministri baspasóz xatkeri Ahror Burhonov, dep xabar beredi xs.uz.

Onıń atap ótiwinshe, Ózbekstan hám BAÁ arasındaǵı vizasız tártip óz kúshinde qalmaqta. Rásmiy dárekler bunday ilajlar engizilgeni haqqında hesh qanday maǵlıwmat bermegen.
«Tek rásmiy hám tastıyıqlanǵan dáreklerge iseniwińizdi sorap qalamız», deydi baspasóz xatkeri.
Sońǵı waqıtlarda Dubay qalasında Ózbekstan puqaraları tárepinen júz berilip atırǵan nızambuzılıwshılıqlar jaǵdayları kóbeyip atırǵanı eki mámleket arasındaǵı vizasız tártipke tásir kórsetiwi múmkin ekenligi haqqında xabarlar óshirildi.
Atap aytqanda, bunnan bir neshe kún aldın sociallıq tarmaqlarda bir topar ózbekstanlılar Dubay qalası kóshelerinde jánjelleskeni hám is pıshaqlasıwǵa shekem barıp jetkeni, usı jaǵday boyınsha 15 Ózbekstan puqarası qolǵa alınǵanı málim etildi.
Waqıyalar fonında Ózbekstan SIM usı jaǵdaylar boyınsha tiyisli huqıq qorǵaw uyımları menen birgelikte jumıs alıp barılıp atırǵanı haqqında rásmiy múnásibet penen shıqtı.
Bildiriliwinshe, júzege shıǵıp atırǵan jaǵdaylar boyınsha Ózbekstan diplomatları hám Dubay jınayat izlew basqarması basshılıǵı arasında ushırasıw bolıp ótken.
Ushırasıw BAÁ tárepi joqarıdaǵı pıshaqlasıw boyınsha tergew háreketleri alıp barılıp atırǵanın hám usı sıyaqlı jaǵdaylar kóbeyip atırǵanı eki mámleket arasındaǵı vizasız tártipke tásir kórsetiwi múmkin ekenligin atap ótken.
Sonlıqtan, SIM baspasóz xatkeri óz Telegram kanalında Ózbekstan puqaraların sırt eldegi watanlaslarımızdıń atına daq túsiretuǵın háreketlerden tıyılıwına shaqırıp, múrájat jolladı.

Qaraqalpaqstan xabar agentligi