Senattıń Ilim, bilimlendiriw hám densawlıqtı saqlaw máseleleri komiteti tárepinen “Bilimlendiriw tarawın rawajlandırıw, onıń sapasın arttırıw ústinen nátiyjeli deputatlıq qadaǵalawdı ámelge asırıwda wákillikli uyımlardıń roli” atamasında seminar shólkemlestirildi.

Oǵan Komitet aǵzaları hám ekspertler, Aymaqlıq wákillikli uyımlardıń jumısın úyreniw orayınıń xızmetkerleri, jergilikli Keńeslerdiń ilim, bilimlendiriw hám densawlıqtı saqlaw máseleleri boyınsha turaqlı komissiyalarınıń aǵzaları, sekretariat baslıqları, aymaqlıq mektepke shekemgi hám mektep bilimlendiriwi basqarması bólimleriniń basshıları hám ǴXQ wákilleri qatnastı.
Atap ótilgenindey, mámleketimizde keyingi jılları xalıq deputatları jergilikli Keńeslerdiń aymaqlardı sociallıq-ekonomikalıq rawajlandırıw, xalıqtı sociallıq qorǵawǵa baylanıslı áhmiyetli máselelerdi sheshiw boyınsha wákillikleri keńeytilip, xalıq hákimiyashılıǵın tolıq ámelge asırıw baǵdarında keń kólemli reformalar ámelge asırılmaqta.
Sonıń ishinde, xalıq deputatları jergilikli Keńeslerdiń wákillik hám funkciyalarına wálayatlar hám Tashkent qalası hákimleriniń tiyisli aymaqtı sociallıq-ekonomikalıq rawajlandırıwdıń eń áhmiyetli máseleleri boyınsha esabatların xalıq deputatları wálayatlar hám Tashkent qalası Keńeslerinde hár sherekte tıńlap barıw kirgizilgen.
Seminarda usı esabatlardı tıńlawda sociallıq-ekonomikalıq rawajlanıwdıń eń áhmiyetli máselelerinen biri bilimlendiriwdiń sapasın arttırıw ústinen deputatlıq qadaǵalawdı ámelge asırıwda jergilikli Keńes deputatları qaysı táreplerge itibar qaratıwı boyınsha anıq usınıslar berildi.
Atap aytqanda, jergilikli Keńeslerdiń ilim, bilimlendiriw hám densawlıqtı saqlaw máseleleri boyınsha turaqlı komissiyaları tárepinen aymaqtaǵı bilimlendiriw mákemelerinde júzege kelgen mashqalalar menen kemshiliklerdi sheshiwge, sonıń ishinde, bilimlendiriwdiń sapasın arttırıwǵa, bilimlendiriw mákemeleriniń materiallıq-texnikalıq bazasın bekkemlewge, pedagog xızmetkerlerdiń mamanlıǵın arttırıwǵa jáne olardıń sociallıq qorǵalıwın kúsheytiwge qaratılǵan ilajlar islep shıǵıw zárúrligi atap ótildi.
Sonday-aq, seminarda jergilikli Keńes deputatlarına Senatqa kelip túsken ilim, bilimlendiriw hám densawlıqtı saqlaw tarawına baylanıslı nızamlardı dodalaw hám tiyisli usınıslar tayarlaw boyınsha senatorlar tárepinen pikir-usınıslar berildi.

ÓzA