Húrmetli festival qatnasıwshıları, húrmetli miymanlar!

Bárinen burın, siz, ázizlerdi ashıq aspan astındaǵı biytákirar muzey qala – áyyemgi Xiywada ótkerilip atırǵan IV Xalıqaralıq baqsıshılıq kórkem óner festivalınıń ashılıwı menen shın kewlimnen qutlıqlayman.
Búgingi kórkem óner bayramında qatnasıp atırǵan abıraylı xalıqaralıq shólkemler hám tuwısqan mámleketlerdiń wákillerine, dúnyanıń qırqtan aslam mámleketinen kelgen xalıq dóretiwshiligi sheberleri, belgili mádeniyat hám kórkem óner ǵayratkerlerine shın júrekten minnetdarshılıǵımdı, joqarı húrmetim hám jaqsı tileklerimdi bildiremen.
Saqawatlı Ózbekstan jerine, áyyemgi Xorezm diyarına xosh keldińiz!
Qádirli doslar!
Xalıqaralıq dárejede abırayı barǵan sayın artıp atırǵan bul ánjuman bıyıl eski Shıǵıs gáwharı – biytákirar Xorezm diyarında ótkerilip atırǵanı oǵan ayrıqsha ruwx hám mazmun baǵıshlamaqta. Bul úlkeniń dástanshılıq mektebi oǵada eski hám bay tariyxqa iye bolıp, “Lázgi” sıyaqlı dúnyaǵa belgili klassikalıq nama-qosıqlar, yoshlı ayaq oyınları mine, usı ullı dáryadan azıqlanıp kelmekte, desek, durıs boladı.
Usı teberik jerden jetisip shıqqan Ózbekstan xalıq baqsıları “Bala baqsı” – Qurbonnazar Abdullaev, “Qalandar baqsı” – Rwzimbay Normatov, Abdulla Qurbonnazarov, Jetmishbay Abdullaev sıyaqlı xosh hawaz hám jarqın talant iyeleri tárepinen joqarı sheklerde jırlanǵan ” Ǵarib ashıq hám Shahsánem,” “Góruǵlı,” “Áwezxan,” “Alpamıs” hám “Qirmandali” sıyaqlı xalıq dástanları milliy mádeniyatımızdıń máńgilik dúrdanaları sıpatında mánawiyatımız ǵáziynesinen bekkem orın alǵanın tereń minnetdarshılıq penen atap ótemiz hám baqsıshılıq kórkem óneriniń búgingi dawamshılarına dóretiwshilik jetiskenlik hám rawajlanıw tileymiz.
Húrmetli festival qatnasıwshıları!
Festival kúnlerinde sizler kórkem ónerdi shın kewilden súyetuǵın miymandos, keńpeyil xalqımız benen qızǵın sóylesiwler ótkerip, elimizdiń bay tariyxı, mádeniyatı hám biybaha qádiriyatları, teberik orınları, Jańa Ózbekstannıń búgingi rawajlanıw jetiskenlikleri, sonıń ishinde, baqsıshılıq kórkem ónerin rawajlandırıw boyınsha ámelge asırılıp atırǵan jumıslar menen jaqınnan tanısıp, jarqın tásirlerge iye bolasız, dep isenemen.
Pursattan paydalanıp, tańlaw qatnasıwshılarına hám festival sheńberinde ótkeriletuǵın xalıqaralıq ilimiy-ámeliy konferenciya jumısına tabıslar tileymen.
Eń jaqsı hám xalıqshıl sezimlerdi jırlawda sizlerge bekkem densawlıq, kúsh-ǵayrat hám ilham bárqulla yar bolsın!

Shavkat Mirziyoev,
Ózbekstan Respublikası Prezidenti