Iordaniyanıń Amman qalasında boks boyınsha 17 jasqa shekemgi jas óspirimler arasında Aziya chempionatı bolıp ótpekte.
Jarısqa Ózbekstan saylandı komandası quramında qaraqalpaqstanlı eki boksshı qatnaspaqta. Atap aytqanda, -70 kg salmaqtaǵı boksshimiz Ulbosın Jalǵasbaeva sherek finalda Qıtay Taypeyi saylandı komandasınıń aǵzası CHeng-Hui Zouni, yarım finalda ukrainalı Vladislava Nalyavaikoni 5:0 esabında jeńip, Aziya chempionatınıń finalına jollamanı qolǵa kirgizdi. Jas óspirimler arasında ótkerilip atırǵan bellesiwlerge +80 kg salmaqta qatnasıp atırǵan Artur Keńesbaev sherek finalda iordaniyalı Issa Omardı jeńgen bolsa, yarım finalda Oleksandr Xomenkonǵa jeńilip qaldı hám bronza medal iyesine aylandı.
Final oyınları 30-aprel kúni bolıp ótedi.
Qábiletli boksshilerimizdi jarısqa tájiriybeli trenerlerden Asqar Jumanov hám Sharaf Aytbaevlar tayarladı.

Adilbay Orazov,
Qaraqalpaqstan xabar agentligi sholıwshısı.