Shomanay rayonındaǵı “EKOTEKS” kárxanasında rayonlıq Kámbaǵallıqtı qısqartıw hám bántlikke kómeklesiw bólimi tárepinen Shańaraq hám hayal-qızlar bólimi menen birgelikte jumıssız puqaralar ushın bos jumıs orınları yarmarkası shólkemlestirildi.

Oǵan, rayon hákiminiń orınbasarı, Shańaraq hám hayal-qızlar bóliminiń baslıǵı T.Qallıqılıchova, Kámbaǵallıqtı qısqartıw hám bántlikke kómeklesiw bóliminiń baslıǵı Ǵ.Qurbanov, tiyisli qánigeler qatnastı.
Atap ótilgenindey, rayonda jańa jumıs orınların jaratıw baǵdarında bir qatar ilajlar alıp barılmaqta. Sonıń ishinde, diyqanshılıq etip, ózin-ózi bánt etiwi arqalı qosımsha dáramat tabıwı ushın puqaralarǵa qıytaq jer, óz isbilermenlik jumısın baslawı ushın subsidiya hám kreditler ajıratılmaqta. “EKOTEKS” kárxanasında da hayal-qızlar ushın bos jumıs orınları bar. Isleymen degenge, barlıq múmkinshilikler jaratıladı
Yarmarka dawamında qatnasıwshılarǵa “EKOTEKS” kárxanasınıń jumısları, jumısshılar ushın jaratılǵan qolaylıqlar hám kárxanadaǵı bos jumıs orınları haqqında maǵlıwmatlar berildi.
Nátiyjede 5 hayal-qızǵa jumısqa ornalasıwǵa jollama berildi. Sonday-aq, 10 puqaraǵa ózin-ózi bánt etiw boyınsha huqıqıy másláhátler berildi.

Qaraqalpaqstan xabar agentligi.