ÓzLiDeP Xojeli rayonlıq Keńesi búgin óz qatarında 2 000 nan aslam hayal-qızdı birlestirgen. Ótken dáwir dawamında Keńes tárepinen hayal-qızlardıń ekonomikalıq, huqıqıy bilimlerin arttırıw, qayta kásipke baǵdarlaw, jumıs penen támiyinlew hám shańaraqlıq kárxanalardı shólkemlestiriw baǵdarında bir qatar iygilikli jumıslar ámelge asırıldı.
“Jańa Ózbekstannıń dóretiwshi hayalları” súreni astında “Isbilermen hayal” tańlawı boyınsha rayondaǵı “Qumbız,” “Qırqınshı,” “Bayterek” hám “Kulap” máhállelerinde ótkerilgen tańlawda da elimizdiń rawajlanıwı hám xalıqtıń abadanlıǵı jolında belsene qatnasıp atırǵan kúsh-ǵayratlı, izleniwsheń, baslamashı isbilermen hám fermer hayal-qızlar qatnastı. Tańlawda olardıń arasınan eń múnásipleri partiya tárepinen shólkemlestirilgen arnawlı jumısshı topar hám tóreshiler quramı tárepinen rayonlıq basqıshqa tańlap alındı.
“Kulap” awılındaǵı “Qatcha mama” kóp tarmaqlı fermer xojalıǵınıń basshısı Matkarimova Aysha apa fermerlik tarawında derlik 40 jıllıq tájiriybege iye, rayon awıl xojalıǵına úlken úles qosqan, 60 gektar jerden jılına 2-3 márte ónim alatuǵın tájiriybeli fermer. “Shuhrat” medalı iyesi fermer Aysha apa xojalıǵında paxta, pomidor-qıyar, malina, shiye hám hár qıylı palız ónimleri hám náller jetistirilip, qońsılas Qazaqstanǵa eksport etiledi, sonday-aq, ishki bazarǵa da tikkeley satıwlardı ámelge asıradı. Házirgi kúnde turaqlı 20 hám 30 máwsimlik jumısshı hayal-qızlardıń bántligin támiyinlep kelmekte.
– 60 gektar jerge paxta-ǵálleni almaslap egip, pomidordı tuqım waqtınan jetistirip, jaqsı dáramat alıp kelmektemiz,- deydi fermer Aysha Matkarimova. – 20 adamdı turaqlı jumıs penen támiyinlewge eristim. 15 hayal-qız hám jastı xojalıǵıma jumısqa alǵanımnan soń olar “Hayal-qızlar” hám “Jaslar” dápterinen shıǵarıldı. Fermerlik penen birgelikte sharwashılıqtı da jolǵa qoyǵanbız. Prezidentimizdiń baslaması menen ámelge asırılıp atırǵan «Insan qádiri ushın» principi tiykarında 10 mıń tawıq baǵıwǵa mólsherlengen qusshılıq kompleksin iske qospaqshıman.
ÓzLiDeP Xojeli rayonlıq Keńesi “Hayal-qızlar qanatı” tárepinen rayondaǵı “Qumbız awıl” máhállesindegi belsendi hám miynetkesh hayal-qızlardan biri – Nargul Qudaybergenovanıń iskerligi jaqınnan úyrenildi. “Qırıq qız tekstil” JShJ baslıǵı sıpatında Nargul apa milliy kiyim-kenshek, kórpe tósek, milliy hám zamanagóy kelinlik kóylekleri hám toy buyımların tigiw hám islep shıǵarıw menen shuǵıllanadı. Bul ónim túrleri tek ǵana jergilikli bazarda emes, al aymaqtaǵı qarıydarlar arasında da úlken talapqa iye. N.Qudaybergenova miynet jolında “Ustaz-shákirt” dástúrin turmısqa engizgen halda, jaslardı da miynetke tartpaqta. Házirgi kúnde 22 turaqlı hám 20 máwsimlik jumısshı menen birgelikte jumıs alıp barmaqta hám olardıń kópshiligi shákirtleri bolıp esaplanadı. Bul bolsa tek ǵana jumıs ornın jaratıw emes, al jaslarǵa kásip úyretiwde de áhmiyetli qádem esaplanadı.
Tańlap alıw basqıshınıń jáne bir qatnasıwshısı Nasiba Eshanova “Qırqinshı” máhállesinde jeke tártiptegi shańaraqlıq isbilermen sıpatında jumıs alıp barmaqta. 2020-jılı shólkemlestirilgen kishi shańaraqlıq biznes, standart xızmetler – shash túrmeklew, kesiw, boyaw, pardozlaw sıyaqlı xızmetlerdi usınıs etedi. Búgingi kúnde gózzallıq salonında 5 hayal-qız jumıs penen támiyinlengen. N.Eshanova olarǵa bilim hám kónlikpelerdi úyretip, “Ustaz-shákirt” dástúrin engizgen.
– Biz awıl hayal-qızlarınıń bántligin támiyinlew haqqında kóp aytamız, biraq olardı jumıssız dew orınsız, – deydi ÓzLiDeP Qaraqalpaqstan Respublikası Keńesiniń bólim baslıǵı Jamila Egambergenova.- Tańlaw qatnasıwshılarınıń kópshiligi awılda jasaydı, erte tańnan keshke shekem turmıs táshwishleri menen tınım tappaydı. Mine, usı táshwishlerinen artıp, jáne biznesin jolǵa qoyǵan, shańaraǵın terbetip, máhállesindegi qońsı hayallardıń bántligin támiyinlewge úles qosıp atırǵan hayal-qızlarımızǵa hár qansha raxmet aytsaq ta az.
Haqıyqatında da, jumıs ornın jaratıp atırǵan, “Hayal-qızlar dápteri”ne kirgizilgen hayal-qızlardı oqıtıp, bántligin támiyinlewge úles qosıp atırǵan hám sol arqalı turmısta óz ornın tabıwına járdem berip atırǵan isbilermen hayal-qızlardıń miyneti, umtılısları itibarǵa ılayıq.
Qaraqalpaqstan xabar agentligi